Ijtimoiy tarmoqlarda bir haydovchi boshqasini “tartibga chaqirib” qo‘yish maqsadida uni quvib o‘tib, keskin tormoz bergani tasvirlangan roliklar tez-tez tarqalib turadi. Biroq bu rulni boshqarib ketayotganda bajarish mumkin bo‘lgan eng ahmoqona ishlardan biri hisoblanadi, chunki orqada kelayotgan mashina tormoz bosishga ulgurmay qolishi oqibatida YTH sodir bo‘lishi mumkin. CARakoom tomonidan e’lon qilingan video ham Mercedes-Benz haydovchisi xuddi shu kabi holatda jiddiy avariyaga uchragani tasvirlangan.
Ma’lumotlarga ko‘ra, videorolik noyabr oyida Polshada suratga olingan. U Mercedes-Benz E-Class universali haydovchisi sekin harakatlanib ketayotgan traktorni quvib o‘tishi bilan boshlangan.
Mashina traktorni shunchaki quvib o‘tib, yo‘lini davom ettirish o‘rniga, Mercedes-Benz haydovchisi kutilmaganda tormozni bosadi va traktor haydovchisini chap tomonga burishga majbur qiladi. Shundan so‘ng, Mercedes yana tezlashib, bu safar qarama-qarshi yo‘nalishga chiqib ketadi va yana tormoz tepkisini boshadi. Bu safar traktorchi vaqtida to‘xtay olmay Mercedes’ning ortiga borib uriladi.
To‘qnashuvdan so‘ng, ikkala mashina ham yo‘l chetiga to‘xtagan va universal haydovchisi avtomobildan tushib, traktorchining oldiga kelgan. Traktorchi “Ofarin, menda barchasi yozib olingan” deganida, Mercedes haydovchisi “Menda ham”, deya javob qaytargan.
“Mercedes-Benz haydovchisining bu kabi jahli chiqishiga nima sabab bo‘lgani noma’lum, biroq uning ushbu xatti-harakati oqilona emasligini mashinaga yetkazilgan zarar ko‘rsatib turibdi”, — deyiladi xabarda.
Izoh (0)