Пойтахт ҳокимлиги «Тошкент шаҳар кўчаларидаги тирбандликнинг олдини олиш мақсадида транспорт воситалари ҳаракатини тартибга солиш тўғрисида»ги қарор лойиҳасини эълон қилди.
Муҳокамага тақдим этилган қарор лойиҳасида Н1 тоифадаги транспорт воситаларининг (оғирлиги 3,5 тоннагача бўлган юк машиналари) шаҳар ичида ҳаракатланишини соат 07:00 дан 10:00 гача ва 17:00 дан 20:00 гача чеклаш таклиф қилинган. Бу эрталаб ва кечқурунги тиғиз вақтларда шаҳарда тирбандликларга қарши курашиш учун амалга оширилганлиги тушунтирилган.
Шунингдек, Тошкент шаҳрининг марказий кўчаларида ҳаракат хавфсизлигини таъминлаш ва транспорт воситаларининг қатновини тартибга солиш мақсадида марказий кўчалар бўйлаб тиркамали аравалар (от ёки бошқа ҳайвонларга қўшиб тортиладиган ёки одам мушак кучи билан ҳаракатга келтириладиган двигатель билан жиҳозланмаган, юк ташишга мўлжалланган қурилма)нинг ҳаракатини чеклаш режалаштирилган.
Лойиҳани муҳокама қилиш 2021 йил 5 январгача давом этади.
Аввалроқ Тошкентдаги 24 та йирик чорраҳанинг ҳаракатланиш тартибини оптималлаштириш орқали тирбандликни 64 фоиз камайтириш режалаштирилгани, Шавкат Мирзиёев Тошкентнинг марказий кўчаларига паркоматлар ўрнатиш бўйича топшириқ бергани ҳамда қор ёғган кунда Тошкент кўчалари 10 баллик тирбандликлар ичида қолгани ҳақида хабар берилганди.
Изоҳ (0)