So‘nggi kunlarda ijtimoiy tarmoqlarda gazeta va jurnallarga majburiy obuna tashkil etilayotgani haqida ma’lumotlar tarqalmoqda. AOKA davriy bosma nashrlarga majburiy tarzda obuna qilish davom etayotgani maqsadga muvofiq emasligini bildirdi.
Agentlik bayonotida aytilishicha, gazeta va jurnallarga obuna bo‘lish ixtiyoriy ravishda, xususan, obunani aholi o‘rtasida targ‘ibot-tashviqot qilish, gazeta va jurnallarning sifati, jozibadorligi va o‘qishliligini ta’minlash, ularni internetga integratsiyalashuvini tezlashtirish orqali amalga oshirilishi lozim.
“Har bir o‘quvchi o‘zi istagan va zarur deb bilgan nashrga ixtiyoriy obuna bo‘lishi kerak”, — deyiladi bayonotda.
AOKA bundan buyon ham gazeta va jurnallarning muassisi bo‘lgan davlat organlari va tashkilotlarini o‘z nashrlarini har tomonlama qo‘llab-quvvatlashga, ularning moddiy-texnik bazasini mustahkamlashga, materiallarning sifatini yaxshilashga va nashrlarni aholi orasida ommalashtirishga chaqirdi.
Koronavirus pandemiyasi davrida ko‘plab gazeta va jurnallar nashr etilmay qolgandi, AOKA davriy bosma ommaviy axborot vositalarini qo‘llab-quvvatlash va rivojlantirish bo‘yicha qo‘shimcha chora-tadbirlarni amalga oshirish taklifini bildirdi.
Ma’lumot uchun, Mehnat kodeksining 164-moddasida xodimlarni ularning yozma roziligisiz, jumladan, shunday rozilik berishga majbur qilingan holda ish haqidan obuna, kommunal to‘lovlar va boshqalar uchun ushlab qolish qonunga zid ekanligi belgilangan.
Izoh (0)