Сўнгги кунларда ижтимоий тармоқларда газета ва журналларга мажбурий обуна ташкил этилаётгани ҳақида маълумотлар тарқалмоқда. АОКА даврий босма нашрларга мажбурий тарзда обуна қилиш давом этаётгани мақсадга мувофиқ эмаслигини билдирди.
Агентлик баёнотида айтилишича, газета ва журналларга обуна бўлиш ихтиёрий равишда, хусусан, обунани аҳоли ўртасида тарғибот-ташвиқот қилиш, газета ва журналларнинг сифати, жозибадорлиги ва ўқишлилигини таъминлаш, уларни интернетга интеграциялашувини тезлаштириш орқали амалга оширилиши лозим.
«Ҳар бир ўқувчи ўзи истаган ва зарур деб билган нашрга ихтиёрий обуна бўлиши керак», — дейилади баёнотда.
АОКА бундан буён ҳам газета ва журналларнинг муассиси бўлган давлат органлари ва ташкилотларини ўз нашрларини ҳар томонлама қўллаб-қувватлашга, уларнинг моддий-техник базасини мустаҳкамлашга, материалларнинг сифатини яхшилашга ва нашрларни аҳоли орасида оммалаштиришга чақирди.
Коронавирус пандемияси даврида кўплаб газета ва журналлар нашр этилмай қолганди, АОКА даврий босма оммавий ахборот воситаларини қўллаб-қувватлаш ва ривожлантириш бўйича қўшимча чора-тадбирларни амалга ошириш таклифини билдирди.
Маълумот учун, Меҳнат кодексининг 164-моддасида ходимларни уларнинг ёзма розилигисиз, жумладан, шундай розилик беришга мажбур қилинган ҳолда иш ҳақидан обуна, коммунал тўловлар ва бошқалар учун ушлаб қолиш қонунга зид эканлиги белгиланган.
Изоҳ (0)