“Rosselxoznadzor” Rossiyaga Farg‘onadagi yettita korxonadan pomidor va qalampir olib kirishga ruxsat berdi

“Rosselxoznadzor” 18-dekabrdan boshlab Rossiyaga O‘zbekistonning Farg‘ona viloyatidagi yettita korxonadan pomidor va qalampir olib kirishga ruxsat berdi. Bu haqda “O‘zdavkarantin” matbuot xizmati ma’lum qildi.

Qayd etilishicha, ushbu korxonalar mahsulotlarida 2020-yilda YeOIIga a’zo davlatlarning karantin ostidagi obyektlar, shuningdek, pomidorning jigarrang burishgan virusi aniqlanmagan.

Quyidagi korxonalarga pomidor olib kirishga ruxsat beriladi:

• MChJ “Oltin daraxt” (Qushtepa tumani);
• “Farhod Rancho” FH (Quvasoy);
• MChJ “Fargona Ziyo quruvchi” (Quvasoy).

Qalampirni olib kirishga ruxsat berilgan korxonalar:

• “Yangi to‘lqin” FH (Oltiariq tumani);
• MChJ “Jilokor Zamini” (Dang‘ara tumani);
• MChJ “Saodatli Dil Farovon” (Dang‘ara tumani);
• MChJ Yo‘ldoshev Eldor (Beshariq tumani).

“Ushbu qaror O‘zbekiston Respublikasi Vazirlar Mahkamasi huzuridagi O‘simliklar karantini davlat inspeksiyasi tomonidan ishlab chiqarish maydonlarini o‘rganish va respublikaning ko‘rsatilgan mintaqasidagi issiqxonalarning holatini tahlil qilish natijalari to‘g‘risida berilgan ma’lumot asosida qabul qilindi”, — deyiladi xabarda.Eslatib o‘tamiz, jigarrang burishgan virusi aniqlangani sababli “Rosselxoznadzor” 26-noyabrdan boshlab Farg‘ona viloyatidan Rossiyaga pomidor va qalampir olib kirishni taqiqlagan edi. Keyinroq quritilgan o‘rik partiyasida ham xavfli zararkunanda (kapr qo‘ng‘izi) aniqlangach, “Rosselxoznadzor” Farg‘onadan barcha turdagi o‘simlik mahsulotlari importini taqiqladi. Rossiya tomoni shu kabi taqiqlarni so‘nggi ikki hafta ichida Navoiy va Qashqadaryo viloyatida yetishtirilgan mahsulotlarga ham joriy etgan.

Farg‘onaga viloyati hokimi Xayrullo Bozorov Rossiyaga yuborilgan pomidordan chiqqan kasallik Farg‘onadagi birorta issiqxonada aniqlanmagani haqida ma’lumot bergan. Hokimning ta’kidlashicha Rossiyaning vakolatli organlari tomonidan Farg‘onada yetishtirilgan barcha qishloq xo‘jaligi mahsulotlari importiga qo‘yilgan taqiq viloyatga juda salbiy ta’sir ko‘rsatadi — taqiq olib tashlanmasa, “Farg‘onaga og‘ir bo‘ladi”.

Avvalroq “Yuksalish” umummilliy harakati yetakchisi, Oliy Majlis Qonunchilik palatasi deputati Bobur Bekmurodov Rossiya tomonidan Farg‘ona, Navoiy va Qashqadaryo viloyatlarida yetishtirilgan qishloq xo‘jaligi mahsulotlari importiga qo‘yilgan taqiqqa munosabat bildirib, “bunday harakatlar... Jahon savdo tashkilotiga a’zolikni tezlashtirish lozimligini yana bir bor eslatayotgani”ni ta’kidlab o‘tgan edi.