Qashqadaryo viloyatining Chiroqchi tumanidagi aholi e’tiroziga sabab bo‘lgan simyog‘ochlar yangisiga almashtirildi. Shuningdek, qishloqdagi masjidga elektr toki tortildi. Bu haqda “Daryo”ga viloyat “Hududiy elektr tarmoqlari” AJ rahbari o‘rinbosari Farrux O‘ralov xabar berdi.
Ta’kidlanishicha, Chiroqchi tumanining “Quruqsoy” qishlog‘i aholisi yillar davomida simyog‘ochlar yaroqsizligidan aziyat chekib kelgan.
“‘Quruqsoy’ qishlog‘idagi elektr ta’minotini yaxshilash maqsadida hududdagi 4,1 km uzunlikdagi elektr tarmog‘i yangilandi. Shuningdek, mavjud transformator punkti kapital ta’mirlanib, 27 dona yangi temir-beton keltirilib o‘rnatildi”, — deydi Farrux O‘ralov.
Hudud aholisining ma’lumot berishicha, talabga javob bermaydigan simyog‘ochlar almashtirilgandan so‘ng qishloqda elektr tokining uzatilishi ham yaxshilangan.
“O‘zim va boshqa fuqarolar bajarilgan ushbu ishlar uchun elektr tarmoqlari korxonasidan minnatdormiz. Avvallari transformatorimiz va elektr tarmoqlarimiz juda yomon holatda edi. Endi hammasi zamonaviy, eng muhimi, xavfsiz bo‘ldi. Transformatorimizni ta’mirlab, yangi elektr tarmog‘i qurib berishdi, bundan tashqari, zamonaviy hisoblagichlar ham keltirib, o‘rnatishdi. Ushbu ishlar amalga oshirilgandan so‘ng elektr ta’minotimiz ham ancha yaxshilandi”, — deydi ushbu qishloqda yashovchi Abdinabi Sheraliyev.
Farrux O‘ralovning qo‘shimcha qilishicha, hududda shu paytga qadar elektr tokisiz faoliyat yuritgan masjidga ham elektr toki o‘tkazib berilgan.
Mavzuga doir:
- Qashqadaryolik tadbirkor uch kun elektrsiz qolgani sabab olti mingta tovug‘idan ayrildi
- Kelesdagi tug‘ruqxona elektr ta’minotida uzilish kuzatildi. Holat yuzasidan izoh berildi
- Paxtaobodliklar elektr tokidagi muammo sabab “Daryo”ga shikoyat qildi. Mas’ullar esa jurnalistga murojaat qilgan aholini jazolashga urinmoqda
Izoh (0)