Qashqadaryo viloyati Qarshi shahrida joylashgan yotoqxonada 13 nafar o‘smir is gazidan zaharlandi. Bu haqda viloyat SSB axborot xizmati xabar berdi.
Ma’lum qilinishicha, 19-dekabr kuni soat 06:50 larda Respublika shoshilinch tibbiy yordam ilmiy markazi Qashqadaryo filialiga is gazidan zaharlangan 13 nafar o‘smir keltirilgan.
Dastlabki ma’lumotlarga ko‘ra, Qarshi shahridagi xususiy o‘quv markazlaridan biriga tegishli yotoqxonada gaz bilan ishlaydigan isitish qozonidagi nosozlik mazkur noxush hodisaga sabab bo‘lgan.
Ta’kidlanishicha, o‘smirlarning hammasi o‘g‘il bola. Ularning eng kichigi 11, eng kattasi 14 yoshda. Zaharlanganlarning 3 nafari og‘ir, 5 nafari o‘rta og‘ir holda shifoxonaga keltirilgan, qolganlariga ambulator sharoitda tibbiy yordam berilgan. Ko‘rsatilgan tibbiy xizmatdan keyin ularning barchasining ahvoli yaxshilangan.
Avvalroq Qoraqalpog‘istonda bir oilaning 4 nafar a’zosi va 2 nafar mehmon is gazidan zaharlanib vafot etgani to‘g‘risida xabar berilgandi.
Ma’lumot uchun, O‘zbekistonda is gazi chaqnashi, is gazidan zaharlanish, havo-gaz aralashmasi chaqnashi bilan bog‘liq holatlar bu yil 2019-yilga nisbatan 22 foizga ko‘paygan.
Izoh (0)