Toshkent viloyati bosh infeksionisti Guljahon Yo‘ldoshevaga nisbatan jinoyat ishi yuzasidan sud jarayonlarida uning ko‘rsatmasi tinglandi. Uning advokati Xushnud Ahrorovning ma’lum qilishicha, Yo‘ldosheva marhum Farrux Rustamovning o‘limiga aloqasi yo‘qligini aytgan. Bu haqda “Gazeta.uz” xabar bermoqda.
“Avvalgi sud majlislarida ayblanuvchi sifatida ishtirok etayotgan boshqa shifokorlar ham Guljahon Yo‘ldosheva marhumning boshqa shifoxonaga ko‘chirilishida to‘g‘ridan to‘g‘ri aralashmaganini aytishgan edi. O‘tgan galgi sudda Yo‘ldosheva marhumning ruhiy-asab kasalliklari dispanseriga o‘tkazilishida umuman ishtirok etmagani va u vaqtda Toshkent viloyat yuqumli kasalliklar shifoxonasida bo‘lmaganini ma’lum qildi”, — dedi advokat Ahrorov.
Yo‘ldoshevaning advokati u ushbu ayblov sabab bir oydan oshiq vaqt davomida qamoqda yotganini qo‘shimcha qildi.
Avvalroq Guljahon Yo‘ldoshevaga nisbatan tergov yakunlanib, jinoyat ishi sudga yuborilgani haqida xabar berilgandi.
Eslatib o‘tamiz, koronavirusga chalingan bemor o‘limi va 250 million so‘m budjet mablag‘larini talon-toroj qilganlikda ayblanib, qamoqqa olingan Toshkent viloyati bosh infeksionisti Guljahon Yo‘ldoshevaga nisbatan jinoyat ishi 2020-yil 11-avgustda Chirchiq shahar prokuraturasi tomonidan qo‘zg‘atilgan. 8-sentabrga kelib, ehtiyot chorasi sifatida ayblanuvchi qamoqqa olingan edi.
Uning qamoqqa olinishi jamoatchilik o‘rtasida keng muhokamalarga sabab bo‘ldi. Bir qator davlat va nodavlat tashkilotlarning rahbarlari, xususan, Senat raisi Tanzila Norboyeva, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari, gender tenglikni ta’minlash masalalari bo‘yicha komissiya a’zosi Saida Mirziyoyeva mazkur hodisaga munosabat bildirib, prokuraturani shifokorga nisbatan qo‘llanilgan ehtiyot chorasi o‘zgartirishga chaqirgan.
Shundan so‘ng Guljahon Yo‘ldosheva 6-oktabr kuni uy qamog‘iga o‘tkazilgandi.
Izoh (0)