Тошкент вилояти бош инфекционисти Гулжаҳон Йўлдошевага нисбатан жиноят иши юзасидан суд жараёнларида унинг кўрсатмаси тингланди. Унинг адвокати Хушнуд Аҳроровнинг маълум қилишича, Йўлдошева марҳум Фаррух Рустамовнинг ўлимига алоқаси йўқлигини айтган. Бу ҳақда «Gazeta.uz» хабар бермоқда.
«Аввалги суд мажлисларида айбланувчи сифатида иштирок этаётган бошқа шифокорлар ҳам Гулжаҳон Йўлдошева марҳумнинг бошқа шифохонага кўчирилишида тўғридан-тўғри аралашмаганини айтишган эди. Ўтган галги судда Йўлдошева марҳумнинг руҳий-асаб касалликлари диспансерига ўтказилишида умуман иштирок этмагани ва у вақтда Тошкент вилоят юқумли касалликлар шифохонасида бўлмаганини маълум қилди», — деди адвокат Аҳроров.
Йўлдошеванинг адвокати у ушбу айблов сабаб бир ойдан ошиқ вақт давомида қамоқда ётганини қўшимча қилди.
Аввалроқ Гулжаҳон Йўлдошевага нисбатан тергов якунланиб, жиноят иши судга юборилгани ҳақида хабар берилганди.
Эслатиб ўтамиз, коронавирусга чалинган бемор ўлими ва 250 миллион сўм бюджет маблағларини талон-торож қилганликда айбланиб, қамоққа олинган Тошкент вилояти бош инфекционисти Гулжаҳон Йўлдошевага нисбатан жиноят иши 2020 йил 11 августда Чирчиқ шаҳар прокуратураси томонидан қўзғатилган. 8 сентябрга келиб, эҳтиёт чораси сифатида айбланувчи қамоққа олинган эди.
Унинг қамоққа олиниши жамоатчилик ўртасида кенг муҳокамаларга сабаб бўлди. Бир қатор давлат ва нодавлат ташкилотларнинг раҳбарлари, хусусан, Сенат раиси Танзила Норбоева, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, гендер тенгликни таъминлаш масалалари бўйича комиссия аъзоси Саида Мирзиёева мазкур ҳодисага муносабат билдириб, прокуратурани шифокорга нисбатан қўлланилган эҳтиёт чораси ўзгартиришга чақирган.
Шундан сўнг Гулжаҳон Йўлдошева 6 октябрь куни уй қамоғига ўтказилганди.
Изоҳ (0)