O‘zbekiston tashqi qarzining umumiy hajmi 2020-yilning dastlabki 9 oyi hisobi bo‘yicha 29,3 milliard dollarni tashkil qildi, deb xabar beradi Markaziy bank. Yil boshiga nisbatan u 19,7 foizga yoki 4,8 milliard dollarga oshgan.
“Ushbu jarayon COVID-19 virusining tarqalishi oqibatida yuzaga kelgan inqirozning ijtimoiy-iqtisodiy ta’sirini yumshatish uchun hamda hududlar va iqtisodiyot tarmoqlarini rivojlantirish bo‘yicha davlat dasturlarini moliyalashtirish uchun yangi qarzlarning jalb qilinishi bilan izohlanishi mumkin”, — deyiladi hisobotda.
Shuningdek, o‘rganilayotgan davr mobaynida davlat tashqi qarzi bo‘yicha 454,8 million dollar miqdordagi asosiy qarz va 263,4 million dollar miqdordagi foiz to‘lovlari amalga oshirilgan.
Xususiy tashqi qarz to‘lovlari asosiy qarz bo‘yicha 1,3 milliard dollar va foiz to‘lovlari bo‘yicha 242,1 million dollarni tashkil qildi. Bunda, asosiy qarz va foizlar bo‘yicha to‘lovlarning eng katta qismini hanuzgacha neft-gaz va energetika sektori korxonalari hamda banklar amalga oshirmoqda.
Avvalroq O‘zbekistonning davlat tashqi qarzi 2020-yilning 10 oyida 18 foizga o‘sgani to‘g‘risida xabar berilgandi.
Eslatib o‘tamiz, S&P Global Ratings xalqaro kredit reyting agentligi O‘zbekistonning uzoq va qisqa muddatli suveren kredit reytingi bo‘yicha navbatdagi hisobotini e’lon qildi. Unga ko‘ra, O‘zbekiston suveren kredit reytingi “BB-” darajasida saqlab qolingan, biroq kelgusi davr uchun “salbiy” prognoz berilgan. Ushbu prognoz hukumatning tashqi qarzi tez sur’atlarda o‘sishda davom etishi mumkinligini aks ettiradi.Moliya vazirligi tomonidan e’lon qilingan “2021-yilgi fuqarolar uchun budjet” loyihasida O‘zbekistonning jami davlat qarzi 2021-yil yakunida 28,4 milliard dollarga (YaIMga nisbatan 44,9 foiz) yetishi prognoz qilinmoqda. Moliya vazirligi esa buni xavfsiz darajada deb hisoblamoqda.
Izoh (0)