ФВВ: Ис гази билан боғлиқ нохуш ҳолатлар 2019 йилга нисбатан 2020 йилда кўпайган

Ўзбекистонда ис газининг чақнаши, ис газидан заҳарланиш, ҳаво-газ аралашмаси чақнаши билан боғлиқ ҳолатлар бу йил 2019 йилга нисбатан 22 фоизга кўпайган. Бу ҳақда 17 декабрь куни Миллий матбуот марказида бўлиб ўтган анжуманда ФВВ бўлим бошлиғи Абдусами Аҳмадов айтиб ўтди, дея хабар бермоқда «Дарё» мухбири.

Маълум қилинишича ис гази чақнаши, ис газидан заҳарланиш, ҳаво-газ аралашмаси чақнаши билан боғлиқ 41 та ҳолат юз берган:

• Қорақалпоғистон Республикасида 3 та;
• Андижон вилоятида 2 та;
• Бухоро вилоятида 1 та;
• Жиззах вилоятида 3 та;
• Қашқадарё вилоятида 4 та;
• Навоий вилоятида 1 та;
• Наманган вилоятида 4 та;
• Самарқанд вилоятида 7 та;
• Сурхондарё вилоятида 1 та;
• Сирдарё вилоятида 3 та;
• Фарғона вилоятида 5 та;
• Тошкент вилоятида 4 та;
• Тошкент шаҳрида 3 та ҳолатда нохуш ҳолатлар учраган.

«Ижтимоий тармоқлардан бу ҳақида маълумот олиш жуда осон. Уларни қидириб, юқоридаги ҳолатлар бўйича билимларга эга бўлишимиз керак. Бепарволик оила аъзоларимизнинг соғлигига ва ҳаттоки ҳаётига ҳам хавф солади. Жойига чиқиб ўрганилган пайтда, кўпинча бир хил муаммо учрайди – дудбўронларнинг нотўғри ўрнатилиши. Дудбўронлар вертикал тарзда чиқарилиши зарур. Айрим ҳолатлардагина 70 градусга букишга рухсат берилади. Уни тирсак билан букиб, горизонтал ҳолатга ўтказиб деразадан чиқариш қатъиян ман этилади. Мана шу нарса олтин қоидага айланиши керак», – деди ФВВ вакили.

Маълумот учун, 2019 йилнинг октябрь ойидан 2020 йилнинг 31 март кунига қадар (иситиш мавсумида) жами 107 та нохуш ҳолат юзага келган. Шулардан 52 таси газ ва ҳаво аралашмасининг чақнаши билан боғлиқ ҳолатлар бўлиб, уларда 89 нафар фуқаро куйиш тан жароҳатини олган, 3 нафар фуқаро вафот этган, шунингдек, 55 та ис газидан заҳарланиш билан боғлиқ ҳолатлар содир бўлиб, уларда 75 нафар фуқаро жабрланган ва 73 нафар фуқаро вафот этган.