Bloger Nikita Makarenko o‘zining Telegram’dagi kanaliga IMEI kodni ro‘yxatga qo‘yish qanchalik murakkab jarayon ekani haqida qator postlarni joylashtirdi. U mobil qurilmasini ro‘yxatdan o‘tkazish uchun UzIMEI tashkiloti binosiga borgani va u yerda qanday tartibsizlikka guvoh bo‘lgani haqida yozgan.
2019-yil 1-apreldan O‘zbekistondagi mobil telefonlar maxsus IMEI kodi bo‘yicha ro‘yxatga olinishi tartibi joriy etilgan edi. Shundan buyon ushbu tartib mobil qurilmalardan foydalanishda qator muammolarni yuzaga keltirmoqda.
Makarenko avvaliga o‘ziga xos so‘rovnoma e’lon qilgan:
“Hozir chet eldan kelgan telefonga IMEI kod olish uchun boraman. Meni nima kutayotganini taxmin qilib ko‘ring!
- Kerakli binoni topa olmayman;
- Topaman, lekin u yerda tushlik vaqti bo‘ladi;
- To‘plagan hujjatlarim yetarli bo‘lmaydi;
- Keyinroq keling, deyishadi;
- Hammasi o‘xshaydi!”.
Keyingi postlarida Makarenko UzIMEI binosida boshidan kechirganlarini hikoya qilgan: “Xo‘sh, men UzIMEI binosini topdim. Faqat do‘stim qayerdaligini tushuntirganidan keyin. Bino “Sebzor” mahallasi ichida joylashgan, unga olib boradigan hech qanday yo‘l ko‘rsatkich yo‘q. Ichkarida katta navbat. Hech qanday elektron navbat haqida gap bo‘lishi mumkin emas, faqat “Kim oxirgi?” deyish amalda.
“Raqamli xizmatlar markazida 11 kishidan iborat jonli navbat Dijital! Innovatsiya! Renessans! Hurmatli Shuhrat Sodiqov (axborot texnologiyalari va kommunikatsiyalarni rivojlantirish vaziri), Bahrom Olmatov (vazir o‘rinbosari) pastga tushib, tizimingiz qanday ishlayotganini ko‘ring”, — deb yozadi bloger.
Makarenkoning ta’kidlashicha, UzIMEI’ni ro‘yxatdan o‘tkazish 1 soat vaqt olgan. “Agar telefonni pochta orqali olib kelishgan bo‘lsa, bojxona deklaratsiyasini ko‘rsatish kerak bo‘ladi. U yerda shunchaki ‘bardak’ hukm surmoqda, navbat, farzandlari sovg‘a qilib yuborgan telefonlardan foydalana olmayotgan qariyalar yig‘lamoqda, xorijliklar hayratdan yoqa ushlab turibdi”, — deya qayd etadi Makarenko.
Shuningdek, u O‘zbekistonda bunday tizim bo‘lmasligi kerakligini, uning mavjudligini faqat korrupsiya bilan izohlash mumkinligini ta’kidlagan.
“Bu shunchaki uquvsizlik va noprofessionallik. Bunday narsani o‘ylab topgan va joriy qilganlarni la’natlayman. Ular islohotlarning haqiqiy dushmani”, — deb yakunlagan Nikita Makarenko seriyali postlarini.
Yana bir taniqli bloger, iqtisodchi Otabek Bakirov Makarenkoning postiga munosabat bildirgan. “UzIMEI xalq va mamlakatga zararkunandalik qilish evaziga boylik orttirish uchun yaralgan. Uni isloh qilib bo‘lmaydi. UzIMEI tugatilishi kerak. Zararkunandalik bilan boylik orttirayotgan, xalq va mamlakatni talayotganlar esa mahkamaga tortilishi lozim”, — deb yozgan Bakirov.
Mavzuga doir:
Keyinroq Davlat bojxona qo‘mitasi ushbu muammoli masala yuzasidan bir qator choralar amalga oshirilganini hamda IMEI kodlarini boshqa shaxslar nomiga ro‘yxatdan o‘tkazish bilan shug‘ullangan jinoiy guruh fosh etilganini ma’lum qildi.
22-sentabr kuni mobil qurilmalarning IMEI kodlarini ro‘yxatdan o‘tkazish tizimi ma’muriyati tomonidan mobil qurilmalarni UzIMEI tizimida ro‘yxatdan o‘tkazish jarayoniga o‘zgartirish kiritilgani ma’lum qilindi. Ushbu tartibga ko‘ra, qurilmaning IMEI kodini/kodlarini ro‘yxatdan o‘tkazishda jismoniy shaxslar tomonidan foydalaniladigan abonent raqami mahalliy mobil operatorlaridan ariza beruvchi nomiga rasmiylashtirilgan bo‘lishi kerak. Biroq qator OAV va blogerlar mazkur o‘zgarish qonunga zid ravishda amalga oshirilgan bo‘lishi mumkin, deb hisoblamoqda.
Izoh (0)