Nukusda jamoat ishlari uchun ish haqi ololmagan ayollar avtomobil yo‘lini to‘sib qo‘ydi

17-dekabr kuni Qoraqalpog‘istonning Nukus shahri markaziy ko‘chalardan birida ayollar yozda karantin paytida jamoat ishlari uchun ish haqi to‘lanmaganligi sababli yo‘lni to‘sib qo‘ydi. Bu haqda Qoraqalpog‘iston yangiliklarini yoritib boruvchi “Makan.uz” xabar bermoqda.

“Gazeta.uz”ning ma’lum qilishicha, ayollar A.Do‘snazarov va M.Jumanazarov ko‘chalari kesishmasidagi shaharning markaziy chorrahalardan biriga borgan va shahar Bandlikka ko‘maklashish markazi ro‘parasida turib olgan. Keyinroq ularni shahar hokimiyati qabul qilgan.

Voqea joyidan olingan suratlarni e’lon qilgan “Makan.uz”ning ma’lum qilishicha, hokimlik ulardan ushbu suratlarni o‘chirib yuborishni so‘ragan.

Avvalroq gaz va elektr ta’minotidagi uzilishlar sabab Buxoro va Andijon viloyatlarida aholi avtomobil yo‘llarini to‘sib qo‘ygani haqida xabar berilgan edi.