Европа комиссияси «ВКонтакте» ижтимоий тармоғи ва Telegram мессенжерини «Контрафакт ва қароқчилик маҳсулотларини кузатиш рўйхати»га қўшиб қўйди. 14 декабрь санаси билан имзоланган ҳужжат Еврокомиссиянинг сайтида эълон қилинган, деб хабар беради Meduza.
«ВКонтакте» ва Telegram мусиқа, китоблар, фильмлар ва муаллифлик ҳуқуқи билан ҳимояланган бошқа контентларни муаллифнинг рухсатисиз фойдаланиш имконини берадиган онлайн-ресурслар рўйхатига киритилган.
Платформалар фойдаланувчилари томонидан тарқатилаётган контентларга нисбатан тушган шикоятлар сабаб рўйхатдан ўрин олган. Муаллифлик ҳуқуқига эга инсонларнинг таъкидлашича, «ВКонтакте» катта миқдордаги қароқчилик контенти билан ажралиб туради, Telegram эса эътирозларга доим ҳам эътибор қаратмайди.
Ҳужжатда таъкидланишича, «ВКонтакте» ва Telegram ўзларининг ушбу рўйхатга киритилишларига эътироз билдирган. Иккала платформа ҳам қароқчилик контентига қарши курашаётганликларини маълум қилган, хусусан, 24 соат ичида барча шикоятларни ўчиришга уринишмоқда.
«Контрафакт ва қароқчилик маҳсулотларини кузатиш рўйхати»га 2018 йилда асос солинган. Унга қароқчилик контентидан фойдаланиш имконини берадиган онлайн-ресурслар, контрафакт дори воситаларини тарқатишга, сотишга боғлиқ сервислар ва онлайн-дўконлар киритилган.
Рўйхатнинг янгиланган версиясидан Telegram ва «ВКонтакте»дан ташқари Россиянинг Seasonvar ва Rutracker онлайн-платформалари, шунингдек, Москвадаги «Горбушкин двор» савдо маркази ҳам киритилган.
Эслатиб ўтамиз, 2015 йилда АҚШ Савдо ваколатхонаси USTR Россиянинг «ВКонтакте» ижтимоий тармоғини, «Rutracker.org» торрент-трекерини, «Rapidgator.net» ва «4shared.com» файл алмашув хизматларини дунёдаги энг йирик «қароқчи» ресурслар рўйхатидан чиқаришдан бош тортганди.
Изоҳ (0)