15-dekabr kuni hukumat delegatsiyasining Yaponiyaga tashrifi chog‘ida O‘zbekiston bosh vaziri o‘rinbosari, investitsiyalar va tashqi savdo vaziri Sardor Umrzoqov Yaponiya Xalqaro hamkorlik agentligi (JICA) prezidenti Shinichi Kitaoka bilan uchrashuv o‘tkazdi. Vazirlik matbuot xizmatining ma’lum qilishicha, uchrashuvda moliyaviy, texnik, madaniy-gumanitar hamkorlikni kengaytirish masalalari muhokama qilingan.
Ma’lumotlarga ko‘ra, muloqot chog‘ida “O‘zbekistonda meva-sabzavot sohasida qiymat zanjirini rivojlantirish” loyihasining qo‘shimcha 200 million dollarlik ikkinchi bosqichini amalga oshirish masalasi ko‘rib chiqilgan. Loyiha birinchi bosqichining yuqori natijadorligi qayd etilgan, uning doirasida qishloq joylarda 85 ta issiqxona va 11 mingta yangi ish o‘rni yaratildi.
Shuningdek, ilg‘or yapon tajribasi va texnologiyalaridan foydalangan holda O‘zbekiston iqtisodiyoti tarmoqlarida qo‘shma loyihalarni amalga oshirishga Yaponiyaning yetakchi kompaniyalarini jalb etishda JICA tomonidan ko‘mak ko‘rsatilishi bo‘yicha kelishuvga erishilgan.
“O‘zbekiston tomoni 2021-yilning yanvar oyidan boshlab Yaponiyaning qator yirik korporatsiya va moliya institutlarida yetakchi lavozimlarni egallagan yaponiyalik ekspert Xiro Ivazakining to‘g‘ridan to‘g‘ri xorijiy investitsiyalarni jalb etish bo‘yicha O‘zbekiston investitsiyalar va tashqi savdo vaziri maslahatchisi bo‘lib ishlashga jalb etilgani uchun minnatdorlik bildirdi”, — deyiladi xabarda.
Uchrashuv yakunlari bo‘yicha tomonlar keng ko‘lamli sohalarda hamkorlikni chuqurlashtirish bo‘yicha keyingi qadamlarni belgilab olgan. Xususan, Yaponiya tomoni O‘zbekiston hududlaridan birida ko‘p tarmoqli shifoxona qurish loyihasini hamkorlikda ishlab chiqish taklifini bildirgan bo‘lib, loyiha JICA grant mablag‘lari hisobiga amalga oshirilishi ko‘zda tutilgan.
Uchrashuv yakunida tomonlar yaqin kelajakda koronavirus pandemiyasi munosabati bilan aviatransportda joriy etilgan cheklovlar bekor qilinishi bilan Shinichi Kitaokaning O‘zbekistonga tashrifini tashkil qilishga kelishib olgani aytilmoqda.
Eslatib o‘tamiz, 2020-yilning sentabr o‘rtalarida Yevropa tiklanish va taraqqiyot bankining sobiq prezidenti Suma Chakrabarti O‘zbekiston Prezidenti Shavkat Mirziyoyevning iqtisodiy rivojlanish, samarali boshqaruv va xalqaro hamkorlik masalalari bo‘yicha maslahatchisi etib tayinlangandi.
Izoh (0)