15 декабрь куни ҳукумат делегациясининг Японияга ташрифи чоғида Ўзбекистон бош вазири ўринбосари, инвестициялар ва ташқи савдо вазири Сардор Умрзоқов Япония Халқаро ҳамкорлик агентлиги (JICA) президенти Шиничи Китаока билан учрашув ўтказди. Вазирлик матбуот хизматининг маълум қилишича, учрашувда молиявий, техник, маданий-гуманитар ҳамкорликни кенгайтириш масалалари муҳокама қилинган.
Маълумотларга кўра, мулоқот чоғида «Ўзбекистонда мева-сабзавот соҳасида қиймат занжирини ривожлантириш» лойиҳасининг қўшимча 200 миллион долларлик иккинчи босқичини амалга ошириш масаласи кўриб чиқилган. Лойиҳа биринчи босқичининг юқори натижадорлиги қайд этилган, унинг доирасида қишлоқ жойларда 85 та иссиқхона ва 11 мингта янги иш ўрни яратилди.
Шунингдек, илғор япон тажрибаси ва технологияларидан фойдаланган ҳолда Ўзбекистон иқтисодиёти тармоқларида қўшма лойиҳаларни амалга оширишга Япониянинг етакчи компанияларини жалб этишда JICA томонидан кўмак кўрсатилиши бўйича келишувга эришилган.
«Ўзбекистон томони 2021 йилнинг январь ойидан бошлаб Япониянинг қатор йирик корпорация ва молия институтларида етакчи лавозимларни эгаллаган япониялик эксперт Хиро Ивазакининг тўғридан-тўғри хорижий инвестицияларни жалб этиш бўйича Ўзбекистон инвестициялар ва ташқи савдо вазири маслаҳатчиси бўлиб ишлашга жалб этилгани учун миннатдорлик билдирди», — дейилади хабарда.
Учрашув якунлари бўйича томонлар кенг кўламли соҳаларда ҳамкорликни чуқурлаштириш бўйича кейинги қадамларни белгилаб олган. Хусусан, Япония томони Ўзбекистон ҳудудларидан бирида кўп тармоқли шифохона қуриш лойиҳасини ҳамкорликда ишлаб чиқиш таклифини билдирган бўлиб, лойиҳа JICA грант маблағлари ҳисобига амалга оширилиши кўзда тутилган.
Учрашув якунида томонлар яқин келажакда коронавирус пандемияси муносабати билан авиатранспортда жорий этилган чекловлар бекор қилиниши билан Шиничи Китаоканинг Ўзбекистонга ташрифини ташкил қилишга келишиб олгани айтилмоқда.
Эслатиб ўтамиз, 2020 йилнинг сентябрь ўрталарида Европа тикланиш ва тараққиёт банкининг собиқ президенти Сума Чакрабарти Ўзбекистон Президенти Шавкат Мирзиёевнинг иқтисодий ривожланиш, самарали бошқарув ва халқаро ҳамкорлик масалалари бўйича маслаҳатчиси этиб тайинланганди.
Изоҳ (0)