Yevropa tiklanish va taraqqiyot bankining sobiq prezidenti Suma Chakrabarti O‘zbekiston Prezidenti Shavkat Mirziyoyevning iqtisodiy rivojlanish, samarali boshqaruv va xalqaro hamkorlik masalalari bo‘yicha maslahatchisi etib tayinlanadi. Bu haqda Suma Chakrabarti o‘zining Twitter’dagi sahifasi orqali ma’lum qildi.
“Hozirgina O‘zbekiston Prezidenti Shavkat Mirziyoyev meni o‘zining iqtisodiy rivojlanish, samarali boshqaruv va xalqaro hamkorlik masalalari bo‘yicha maslahatchisi etib tayinlaganini eshitdim, bundan juda xursandman. Unga islohotlar dasturini amalga oshirishda yordam berishdan mamnun bo‘laman”, — deb yozadi Chakrabarti.
Suma Chakrabarti 1959-yili Jalapaygur (Hindiston) shahrida tug‘ilgan, bolaligi Kalkutta shtatida o‘tgan. 1964-yilda Chakrabarti oilasi Buyuk Britaniyaga ko‘chib kelgan. Suma o‘rta ta’limni London maktabida, bakalavr darajasini Oksfordda, magistraturani esa Sasseks universitetida olgan.
Chakrabarti 1984-yilda Buyuk Britaniyaning chet eldagi rivojlanish boshqarmasiga katta iqtisodiy yordamchi sifatida qo‘shilgan va Britaniya makroiqtisodiyoti masalalari bilan shug‘ullangan. 1980-yilda Britaniya hukumati tomonidan Jahon bankining Xalqaro valyuta jamg‘armasiga yo‘naltirilgan. 1996-yilda u qirollik g‘aznasiga o‘tgan, shundan keyin Vazirlar mahkamasi tarkibida faoliyat yuritgan.
2012—2020-yillar davomida Chakrabarti Yevropa taraqqiyot va tiklanish banki prezidenti etib saylangan.
Tengrinews’ning yozishicha, 14-sentabr kuni Suma Chakrabarti Qozog‘iston prezidenti Qosim-Jo‘mart To‘qayevning iqtisodiy rivojlanish masalalari bo‘yicha shtatdan tashqari maslahatchisiga aylangan.
Eslatib o‘tamiz, iyul oyining o‘rtalarida Prezident Shavkat Mirziyoyev Yevropa tiklanish va taraqqiyot bankining sobiq prezidenti Suma Chakrabartini “Do‘stlik” ordeni bilan mukofotlash to‘g‘risidagi farmonni imzolagandi.
Izoh (0)