O‘zbekiston futbol assotsiatsiyasi mamlakatda Osiyo Kubogi—2027 musobaqasini o‘tkazish bo‘yicha bergan arizasini qaytarib oldi. Bu haqda o‘zbekistonlik futbol mutaxassisi Alisher Nikimbayev o‘zining Telegram’dagi kanalida ma’lum qildi.
Qayd etilishicha, O‘FA Osiyo futbol konfederatsiyasiga Osiyo Kubogi—2027 mezbonligi uchun topshirgan arizasini qaytarib olish bo‘yicha rasmiy bildirish bilan chiqqan.
Shu tariqa O‘zbekiston Osiyo Kubogi mezbonligi uchun kurashdan chiqdi. Mezbonlik uchun da’vogarlar esa ayni damda 4 tani tashkil etmoqda: Hindiston, Eron, Qatar, Saudiya Arabistoni.
Eslatib o‘tamiz, O‘zbekiston 2020-yil iyun oyida futbol bo‘yicha Osiyo Kubogi—2027 musobaqasi mezbonligi uchun ariza topshirgandi.
O‘shanda OFK tender qatnashchilarining imkoniyatlarini baholashni boshlab yuborishi va yakuniy qaror 2021-yilda chiqarilishi aytilgandi.
Ma’lumot uchun, 2020-yil may oyida 2030-yilgi Osiyo o‘yinlari mezbonligiga da’vogar davlatlar ro‘yxati e’lon qilingandi. Avvalroq ushbu musobaqa mezbonligiga o‘z nomzodini qo‘yishi aytilgan O‘zbekiston ariza topshirmagani ma’lum bo‘lgandi.
Futbol bo‘yicha Osiyo Kubogi mezbonligi uchun quyidagi asosiy talablar mavjud:
- Xalqaro aeroportdan 200 kilometr oralig‘ida joylashgan kamida 2 ta shahar va 8 ta stadion, shu bilan birga har bir stadionning minimal sig‘imi guruh bosqichi bahslari (ochilish o‘yinidan tashqari), 1/8 va 1/4 o‘yinlari uchun 20 mingdan kam bo‘lmasligi kerak.
- Yarim final o‘yinlari uchun 40 ming kishini o‘z bag‘riga sig‘dira oladigan stadion, ochilish va final uchun uchrashuvlari uchun esa 50 ming kishilik stadionlar kerak bo‘ladi. Shuningdek, stadionlardagi yoritish tizimi 2,5 ming lyuksdan kam bo‘lmasligi lozim.
- Shu bilan birga mezbon mamlakatda kamida 30 ta besh yulduzli mehmonxonalar faoliyat yuritishi kerak.
Izoh (0)