Jahon futbolida o‘z o‘rniga ega bo‘lgan Braziliya deyarli barcha davrlarda o‘zining nomdor va yetuk o‘yinchilari bilan maqtanib kelgan. Bunga Yevropaning istalgan (top) klubida hech bo‘lmaganda bir nafar braziliyalik futbolchining borligi yaqqol isbot bo‘la oladi. Quyida esa e’tiboringizga pentakampeonlar yurtining ayni damdagi eng yaxshi futbolchilari (2019/20-yilgi mavsumdagi natijalari ham inobatga olingan) beshligini (boisi ularning barchasi haqida yozish imkonsiz) havola etamiz.
Tiago Silva
Garchi, PSJ Tiago Silvaning xizmatlaridan voz kechgan bo‘lsa-da, u o‘ziga yangi jamoa topishda aslo qiynalmadi va Frenk Lempard boshchiligidagi “Chelsi” safiga qo‘shildi. U 36 yoshida PSJning Chempionlar Ligasidagi muvaffaqiyatlarining asosiy sababchilaridan biri bo‘lgandi. Shu bilan birga u dunyoning eng kuchli chempionati Angliya Premyer Ligasida ham namunali o‘yin ko‘rsatib kelmoqda. Uning maydondagi harakatlariga nazar tashlanar ekan, hech kim Silvani 36 yoshli futbolchi demaydi. Agar Silva ushbu formasini ushlab qola olsa, yana bir-ikki mavsum davomida yuqori darajada o‘ynashi mumkin.
Kazemiro
Futbol tarixida eng past baholangan va garchi, bunga loyiq bo‘lsa-da, super yulduz darajasiga chiqmagan yarim himoyachi maydondagi “qora” ishlarni bajarish bilan birga tez-tez gollar ham urib turadi.
“Real” futbolchisi klubi inqirozni boshdan o‘tkazayotganiga qaramay, (uzoq yillardan beri) barqarorlikni ushlab turibdi. Uning butun jamoani yelkasida tortib yuribdi deyish noto‘g‘ri bo‘lar-u, lekin Kazemironing yetakchi ekanligiga hech kimda shubha yo‘q. Madrid klubining 2019/20-yilgi Ispaniya chempionatidagi g‘alabasini ham Kazemirosiz tasavvur qilish mushkul. Ayni paytda u 27 yoshda va faoliyatidagi eng yaxshi yillarni o‘tkazmoqda.
Roberto Firmino
Firmino hozirda pozitsiyasini biroz boy bergan va kam gol urayotgan bo‘lsa-da, birgina harakati bilan yuqori darajadagi hujumchi ekanini isbotlab qo‘ymoqda. Shu bilan birga Firminoning (Kazemiro darajasida bo‘lmasa ham) maydonda muntazam ravishda “qora” ishlarni bajarayotganini ko‘rish mumkin — pressing va doimiy ravishda himoyachilarga yordam berish. Uning texnikasi va g‘ayrioddiy paslarini esa ortiqcha ta’riflamagan ma’qul. Umuman olganda, “Liverpul” nomini tiklanishi, Chempionlar Ligasi va APLdagi g‘alabalarda 29 yoshli Firminoning hissasi beqiyos ekanini hech kim inkor eta olmaydi.
Alison
Yurgen Klopp boshchiligidagi “Liverpul”ning braziliyalik qahramonlaridan yana biri bu, shubhasiz, Alison.
27 yoshli Alison bugungi kunda zamonamizning eng kuchli darvozabonlaridan biri hisoblanadi va har bir o‘yinda buni isbotlashdan aslo charchamaydi. Aynan uning kelishi bilan Mersisayd klubida uzoq davom etgan darvozabonlar taqchilligiga barham berildi. Bundan tashqari Alison terma jamoasi safida ham yuqoridagi vatandoshlari singari ishonchli va barqaror o‘yinlar ko‘rsatib kelmoqda.
Neymar
Ushbu ro‘yxatdan Neymarning joy olmasligi mantiqsizlikdan bo‘lak hech narsa bo‘lmasdi. U xoh jarohat olsin, xoh yig‘loqi bo‘lsin, baribir futbol va Braziliya yulduzi bo‘lib qolaveradi. Ko‘pchilik uni Messining soyasidan qochib, Mbappega tutilgani haqida gapiradi. Biroq tan olish lozimki, ayni paytda aynan Neymar PSJning asosiy yulduzidir. Aynan braziliyalik jamoasini Chempionlar Ligasi finaliga qadar yetaklab bordi. Aksariyat insonlar uning hali ham “bolakay” ekanligini va doimo sho‘xliklar qilib yurishini aytadi. Biroq unutmaslik kerakki, aynan shu jihatlar uni Neymar qilgan.
Hozir Neymar 28 yoshda va unda hali Chempionlar Ligasi va “Oltin to‘p”ni qo‘lga kiritish uchun imkoniyatlar bo‘ladi. Zero, u aynan shuning uchun “Barselona”dan ketgan.
Izoh (0)