Andijonning Asaka tumani aholisi yetkazib berilgan ichimlik suvi va oqova suv tashlash xizmatlaridan 2 milliard 700 million so‘m qarzdor bo‘lgan. Bu haqda Asaka tumani hokimi Mansurbek Alixonov Xalq deputatlari tuman Kengashining navbatdagi sessiyasida ma’lum qildi.
“Daryo” muxbirining xabar berishicha, 2020-yil 14-dekabr kuni Asaka tumani hokimligida Xalq deputatlari tuman Kengashining navbatdagi 14-sessiyasi o‘tkazilgan. Unda hokim Mansurbek Alixonovning 2020-yilda tumanni ijtimoiy-iqtisodiy rivojlantirish borasida amalga oshirilgan ishlar yuzasidan hisoboti va 2021-yilda amalga oshirilishi lozim bo‘lgan rejalari tinglangan.
2020-yilning o‘tgan davri mobaynida sanoat, xizmat ko‘rsatish va qishloq xo‘jaligi sohalarida umumiy qiymati 482 milliard 179 million so‘mlik 52 ta loyiha amalga oshirilgan. Natijada 2 497 ta yangi ish o‘rini yaratilgan. Loyihalarning ishga tushishi natijasida 204,4 milliard so‘mlik ishlab chiqarish quvvatlari yaratilgan. Kelgusi yil uchun 1,6 million dollarlik eksport qilish imkoniyati vujudga kelgan.
Hokimning qayd etishicha, aholini qiynayotgan kommunal sohadagi mavjud muammolarni hal etish bo‘yicha ham amaliy ishlar qilingan. Jumladan, tumanda elektr energiya ta’minoti tizimini modernizatsiya qilish bo‘yicha joriy yilda 54 ta mahalla fuqarolar yig‘inlarida jami 28,1 km uzunlikda elektr havo tarmog‘i qurish, 33 ta yangi transformator punktlarini o‘rnatish ishlari amalga oshirilgan. Shuningdek, yil davomida umumiy uzunligi 160 km bo‘lgan 26 ta umumiy foydalanuvdagi avtomobil yo‘llarini ta’mirlash ishlari olib borilgan.
Ta’kidlanishicha, Asaka tumani aholisini qiynayotgan asosiy masala bu — ichimlik suvi bo‘lib, 2020-yil davomida 16 milliard 751 million so‘m budjet mablag‘iga 34 ta mahalla hududida jami 95 km uzunlikdagi ichimlik suvi tarmog‘i tortish ishlari, 5 ta yangi ichimlik suvi qudug‘ini qurish hamda 3 ta mavjud quduqni kapital ta’mirlash ishlari bajarilgan. Natijada ichimlik suvi bilan ta’minlanganlik darajasi 85 foizga yetkazilib, 2700 dan ziyod xonadonlarda ichimlik suvi ta’minoti yaxshilangan.
“Mahallalar hududida ichimlik suvi ta’minoti yaxshilangan bo‘lsa-da, yetkazib berilgan ichimlik suvi uchun to‘lovlar qoniqarsiz holatda. Ya’ni to‘lanishi lozim bo‘lgan to‘lovlarning 95 foizi to‘lanmagan. Oqibatda Suv ta’minoti Asaka tuman bo‘limining moddiy va texnikaviy bazasi achinarli holatga kelib qolmoqda. Hozirgi kunga kelib yetkazib berilgan ichimlik suv va oqova suv tashlash xizmatlari uchun aholining 2 milliard 700 million so‘m qarzdorligi mavjud”, — dedi Mansurbek Alixonov.
Izoh (0)