Андижоннинг Асака тумани аҳолиси етказиб берилган ичимлик суви ва оқова сув ташлаш хизматларидан 2 миллиард 700 миллион сўм қарздор бўлган. Бу ҳақда Асака тумани ҳокими Мансурбек Алихонов Халқ депутатлари туман Кенгашининг навбатдаги сессиясида маълум қилди.
«Дарё» мухбирининг хабар беришича, 2020 йил 14 декабрь куни Асака тумани ҳокимлигида Халқ депутатлари туман Кенгашининг навбатдаги 14-сессияси ўтказилган. Унда ҳоким Мансурбек Алихоновнинг 2020 йилда туманни ижтимоий-иқтисодий ривожлантириш борасида амалга оширилган ишлар юзасидан ҳисоботи ва 2021 йилда амалга оширилиши лозим бўлган режалари тингланган.
2020 йилнинг ўтган даври мобайнида саноат, хизмат кўрсатиш ва қишлоқ хўжалиги соҳаларида умумий қиймати 482 миллиард 179 миллион сўмлик 52 та лойиҳа амалга оширилган. Натижада 2 497 та янги иш ўрини яратилган. Лойиҳаларнинг ишга тушиши натижасида 204,4 миллиард сўмлик ишлаб чиқариш қувватлари яратилган. Келгуси йил учун 1,6 миллион долларлик экспорт қилиш имконияти вужудга келган.
Ҳокимнинг қайд этишича, аҳолини қийнаётган коммунал соҳадаги мавжуд муаммоларни ҳал этиш бўйича ҳам амалий ишлар қилинган. Жумладан, туманда электр энергия таъминоти тизимини модернизация қилиш бўйича жорий йилда 54 та маҳалла фуқаролар йиғинларида жами 28,1 км узунликда электр ҳаво тармоғи қуриш, 33 та янги трансформатор пунктларини ўрнатиш ишлари амалга оширилган. Шунингдек, йил давомида умумий узунлиги 160 км бўлган 26 та умумий фойдаланувдаги автомобиль йўлларини таъмирлаш ишлари олиб борилган.
Таъкидланишича, Асака тумани аҳолисини қийнаётган асосий масала бу — ичимлик суви бўлиб, 2020 йил давомида 16 миллиард 751 миллион сўм бюджет маблағига 34 та маҳалла ҳудудида жами 95 км узунликдаги ичимлик суви тармоғи тортиш ишлари, 5 та янги ичимлик суви қудуғини қуриш ҳамда 3 та мавжуд қудуқни капитал таъмирлаш ишлари бажарилган. Натижада ичимлик суви билан таъминланганлик даражаси 85 фоизга етказилиб, 2700 дан зиёд хонадонларда ичимлик суви таъминоти яхшиланган.
«Маҳаллалар ҳудудида ичимлик суви таъминоти яхшиланган бўлса-да, етказиб берилган ичимлик суви учун тўловлар қониқарсиз ҳолатда. Яъни тўланиши лозим бўлган тўловларнинг 95 фоизи тўланмаган. Оқибатда сув таъминоти Асака туман бўлимининг моддий ва техникавий базаси ачинарли ҳолатга келиб қолмоқда. Ҳозирги кунга келиб етказиб берилган ичимлик сув ва оқова сув ташлаш хизматлари учун аҳолининг 2 миллиард 700 миллион сўм қарздорлиги мавжуд», — деди Мансурбек Алихонов.
Изоҳ (0)