Жаҳон футболида ўз ўрнига эга бўлган Бразилия деярли барча даврларда ўзининг номдор ва етук ўйинчилари билан мақтаниб келган. Бунга Европанинг исталган (топ) клубида ҳеч бўлмаганда бир нафар бразилиялик футболчининг борлиги яққол исбот бўла олади. Қуйида эса эътиборингизга пентакампеонлар юртининг айни дамдаги энг яхши футболчилари (2019/20 йилги мавсумдаги натижалари ҳам инобатга олинган) бешлигини (боиси уларнинг барчаси ҳақида ёзиш имконсиз) ҳавола этамиз.
Тиаго Сильва
Гарчи, ПСЖ Тиаго Сильванинг хизматларидан воз кечган бўлса-да, у ўзига янги жамоа топишда асло қийналмади ва Фрэнк Лэмпард бошчилигидаги «Челси» сафига қўшилди. У 36 ёшида ПСЖнинг Чемпионлар Лигасидаги муваффақиятларининг асосий сабабчиларидан бири бўлганди. Шу билан бирга у дунёнинг энг кучли чемпионати Англия Премьер Лигасида ҳам намунали ўйин кўрсатиб келмоқда. Унинг майдондаги ҳаракатларига назар ташланар экан, ҳеч ким Сильвани 36 ёшли футболчи демайди. Агар Сильва ушбу формасини ушлаб қола олса, яна бир-икки мавсум давомида юқори даражада ўйнаши мумкин.
Каземиро
Футбол тарихида энг паст баҳоланган ва гарчи, бунга лойиқ бўлса-да, супер юлдуз даражасига чиқмаган ярим ҳимоячи майдондаги «қора» ишларни бажариш билан бирга тез-тез голлар ҳам уриб туради.
«Реал» футболчиси клуби инқирозни бошдан ўтказаётганига қарамай, (узоқ йиллардан бери) барқарорликни ушлаб турибди. Унинг бутун жамоани елкасида тортиб юрибди дейиш нотўғри бўлар-у, лекин Каземиронинг етакчи эканлигига ҳеч кимда шубҳа йўқ. Мадрид клубининг 2019/20 йилги Испания чемпионатидаги ғалабасини ҳам Каземиросиз тасаввур қилиш мушкул. Айни пайтда у 27 ёшда ва фаолиятидаги энг яхши йилларни ўтказмоқда.
Роберто Фирмино
Фирмино ҳозирда позициясини бироз бой берган ва кам гол ураётган бўлса-да, биргина ҳаракати билан юқори даражадаги ҳужумчи эканини исботлаб қўймоқда. Шу билан бирга Фирминонинг (Каземиро даражасида бўлмаса ҳам) майдонда мунтазам равишда «қора» ишларни бажараётганини кўриш мумкин — прессинг ва доимий равишда ҳимоячиларга ёрдам бериш. Унинг техникаси ва ғайриоддий пасларини эса ортиқча таърифламаган маъқул. Умуман олганда, «Ливерпуль» номини тикланиши, Чемпионлар Лигаси ва АПЛдаги ғалабаларда 29 ёшли Фирминонинг ҳиссаси беқиёс эканини ҳеч ким инкор эта олмайди.
Алисон
Юрген Клопп бошчилигидаги «Ливерпуль»нинг бразилиялик қаҳрамонларидан яна бири бу, шубҳасиз, Алисон.
27 ёшли Алисон бугунги кунда замонамизнинг энг кучли дарвозабонларидан бири ҳисобланади ва ҳар бир ўйинда буни исботлашдан асло чарчамайди. Айнан унинг келиши билан Мерсисайд клубида узоқ давом этган дарвозабонлар тақчиллигига барҳам берилди. Бундан ташқари Алисон терма жамоаси сафида ҳам юқоридаги ватандошлари сингари ишончли ва барқарор ўйинлар кўрсатиб келмоқда.
Неймар
Ушбу рўйхатдан Неймарнинг жой олмаслиги мантиқсизликдан бўлак ҳеч нарса бўлмасди. У хоҳ жароҳат олсин, хоҳ йиғлоқи бўлсин, барибир футбол ва Бразилия юлдузи бўлиб қолаверади. Кўпчилик уни Мессининг соясидан қочиб, Мбаппега тутилгани ҳақида гапиради. Бироқ тан олиш лозимки, айни пайтда айнан Неймар ПСЖнинг асосий юлдузидир. Айнан бразилиялик жамоасини Чемпионлар Лигаси финалига қадар етаклаб борди. Аксарият инсонлар унинг ҳали ҳам «болакай» эканлигини ва доимо шўхликлар қилиб юришини айтади. Бироқ унутмаслик керакки, айнан шу жиҳатлар уни Неймар қилган.
Ҳозир Неймар 28 ёшда ва унда ҳали Чемпионлар Лигаси ва «Олтин тўп»ни қўлга киритиш учун имкониятлар бўлади. Zero, у айнан шунинг учун «Барселона»дан кетган.
Изоҳ (0)