Suyultirilgan gaz yetkazib berish Samarqand, Qashqadaryo va Surxondaryo viloyatlarida reja-jadvalga nisbatan ortda qolmoqda. Bu haqda ayni paytda Shavkat Mirziyoyev raisligida o‘tkazilayotgan videoselektor yig‘ilishida so‘z bordi, deya xabar bermoqda “Daryo” muxbiri.
“Qish mavsumida aholi ehtiyojini qoplash uchun yana 217 ming tonna suyultirilgan gaz yetkazib berishni ta’minlash lozim. Xususan, suyultirilgan gaz yetkazib berish Samarqandda – 4,5 ming tonna, Qashqadaryo va Surxondaryoda – 4 ming tonnadan, Andijon va Namanganda – 3 ming tonnadan reja-jadvalga nisbatan ortda qolyapti.
Mas’ul tashkilot rahbarlari viloyat hokimlari bilan birga issiqlik ta’minotidagi 153 ta (23 foiz) qozonxonani va 2 ming 802 kilometr (66 foiz) issiqlik tarmoqlarini ta’mirlash, 1 ming 784 ta (12 foiz) ko‘p qavatli uyni issiqlik ta’minoti bilan qamrab olish bo‘yicha aniq takliflar kiritishi lozim”, – dedi O‘zbekiston Prezidenti.
Yig‘ilishda ma’lum bo‘lishicha, Andijonda – 32 ta, Namanganda – 27 ta, Qashqadaryoda – 16 ta, Jizzaxda – 10 ta qozonxona ta’mirtalab ahvolda.
“Aholiga ajratilgan mahalliy ko‘mirning 60 ming tonnasi hali egalariga yetkazib berilmasdan, omborlarda turibdi. Ko‘mirning sifati bo‘yicha ham ba’zi viloyatlarda hozirgacha e’tirozlar bor. Ko‘mir yetkazib berishda kundalik nazoratni yana-da kuchaytirishimiz va bu jarayonni tizimli yo‘lga qo‘yishda uchrayotgan muammolarni qisqa vaqt ichida bartaraf etishimiz zarur”, – dedi Shavkat Mirziyoyev.
Ushbu selektorga oid boshqa xabarlar:
- “Elektr, tabiiy va suyultirilgan gaz, issiqlik ta’minotidagi uzilishlar hamda benzin narxining oshgani aholining haqli e’tirozlariga sabab bo‘lmoqda” – Shavkat Mirziyoyev
- Shavkat Mirziyoyev elektr energiyasi bo‘yicha qaysi viloyatlarda ko‘p tanqislik kuzatilayotganligini ma’lum qildi
- Shavkat Mirziyoyev gaz eksportini qisqartirib, aholi ehtiyojlarini qondirish bo‘yicha ko‘rsatma berganini ma’lum qildi
- Shavkat Mirziyoyev elektr energiyasi, tabiiy gaz va ko‘mir ta’minotida yo‘l qo‘yilayotgan noqonuniy xatti-harakatlar haqida gapirdi
Izoh (0)