Shavkat Mirziyoyev elektr energiyasi, tabiiy gaz va ko‘mir ta’minotida yo‘l qo‘yilayotgan noqonuniy xatti-harakatlar haqida gapirdi

O‘zbekistonda 2020-yilning dekabr oyida huquq-tartibot organlari tomonidan o‘tkazilgan o‘rganishlar natijasida respublika bo‘yicha 1 ming 525 ta holatda 59 milliard so‘m qiymatdagi energoresurslar talon-taroj qilingani aniqlangan. Bu haqda ayni paytda Shavkat Mirziyoyev raisligida o‘tkazilayotgan videoselektor yig‘ilishida so‘z bordi, deya xabar bermoqda “Daryo” muxbiri.

Davlat rahbari elektr energiyasi, tabiiy gaz va ko‘mir ta’minotida noqonuniy xatti-harakatlarga ham yo‘l qo‘yilayotgani haqida so‘z yuritdi.

“Toshkent viloyati Yangiyo‘l tumani elektr ta’minoti korxonasi bosh muhandisi o‘z xodimlari bilan 500 dollardan 2 ming dollargacha pora olib, hech qanday rasmiy hujjatlarsiz iste’molchilarni elektr tarmog‘iga ulab kelgan. Samarqand viloyati hokimligi vakillarining beparvoligi oqibatida aholiga mo‘ljallagan 80 tonna suyultirilgan gaz o‘g‘irlanishiga yo‘l qo‘yilgan.

Yoki bo‘lmasa, Muborakda g‘isht ishlab chiqarish zavodi yer ostidan o‘tgan gaz quvuriga noqonuniy ulanishi oqibatida, 4,3 million kub metr gazni talon-toroj qilgan. Bu – qariyb 8 ming xonadonning bir oylik gaz ta’minotidir. Toshkent shahridagi ‘Toshissiqquvvati’ korxonasiga qarashli ‘Sanoat energiya’ qozonxonasi hududida tashkil etilgan ohak ishlab chiqarish sexi gaz tarmog‘iga noqonuniy ulanib, 571 ming kub metr gaz sarflagan. Agar to‘liq hisoblagichlarni o‘rnatganimizda, bu kabi noqonuniy ishlar kuzatilmasdi”, – dedi prezident.

Yig‘ilishda ta’kidlanishicha, 2020-yilda 74 ta tumandagi aholi punktlarida yirik gaz tarmoqlariga zamonaviy o‘lchagichlar o‘rnatish oqibatida 2 mingdan ziyod ulgurji iste’molchilar tomonidan 7 million kub metr tabiiy gaz noqonuniy o‘zlashtirilgani oydinlashgan. Bosh prokuratura va soliq idoralari ko‘mir oldi-sotdisi bilan bog‘liq 110 ta noqonuniy holatni aniqlangan. Namanganda – 54 ta (362 tonna), Andijonda – 33 ta (145 tonna), Farg‘onada − 9 ta (88 tonna), Navoiyda – 7 ta (21 tonna), Qoraqalpog‘istonda – 3 ta (12 tonna) holat aniqlangan.