Shavkat Mirziyoyev elektr energiyasi bo‘yicha qaysi viloyatlarda ko‘p tanqislik kuzatilayotganligini ma’lum qildi

So‘nggi uch yilda umumiy quvvati 2 ming 280 megavatt bo‘lgan To‘raqo‘rg‘on va Taxiatoshda – 2 tadan, Navoiy va Toshkent issiqlik stansiyalarida – 1 tadan yangi energobloklar ishga tushirildi. Bu haqda ayni paytda Shavkat Mirziyoyev raisligida o‘tkazilayotgan yig‘ilishda so‘z yuritildi, deya xabar bermoqda “Daryo” muxbiri.

Yig‘ilishda ta’kidlanganidek, elektr energiyasi bo‘yicha ko‘p tanqislik Samarqand viloyatida sutkasiga 1,6 million kilovatt soat, Andijon, Farg‘ona va Qashqadaryoda – 1,5 million kilovatt-soatdan, Namanganda – 1,3 million kilovatt-soatni tashkil etmoqda.

“Albatta, 30 yilda aholi soni 2 baravar o‘sganini inobatga olsak, 3 yilda o‘ttiz yillik qoloqlikni bartaraf etib bo‘lmaydi. Shuning uchun, respublika bo‘yicha bir kunda o‘rtacha 2 ming 142 ta mahalladagi 1 million 435 mingta xonadonda elektrdan uzilishlar kuzatilgan. Ushbu uzilishlarga asosan, elektr energiyasiga bo‘lgan iqtisodiyot tarmoqlari va aholi talabining kundan-kunga oshib borishi, shuningdek, taqsimlovchi tarmoqlarning 60 foizi eskirgani sabab bo‘lmoqda”, – dedi davlat rahbari.

Qayd etilishcha, Qashqadaryo va Farg‘onada – 3 ming kilometrdan, Andijon, Samarqand va Toshkent viloyatida – 2,5 ming kilometrdan, Qoraqalpog‘iston, Namangan va Xorazmda – 2 ming kilometrgacha past kuchlanishli liniyalar foydalanish muddatini o‘tab bo‘lgan.

Avvalroq Prezident elektr, tabiiy va suyultirilgan gaz, issiqlik ta’minotidagi uzilishlar hamda benzin narxining oshgani sabab aholida haqli e’tirozlar bo‘layotganini ta’kidlagandi.