Суюлтирилган газ етказиб бериш Самарқанд, Қашқадарё ва Сурхондарё вилоятларида режа-жадвалга нисбатан ортда қолмоқда. Бу ҳақда айни пайтда Шавкат Мирзиёев раислигида ўтказилаётган видеоселектор йиғилишида сўз борди, дея хабар бермоқда «Дарё» мухбири.
«Қиш мавсумида аҳоли эҳтиёжини қоплаш учун яна 217 минг тонна суюлтирилган газ етказиб беришни таъминлаш лозим. Хусусан, суюлтирилган газ етказиб бериш Самарқандда – 4,5 минг тонна, Қашқадарё ва Сурхондарёда – 4 минг тоннадан, Андижон ва Наманганда – 3 минг тоннадан режа-жадвалга нисбатан ортда қоляпти.
Масъул ташкилот раҳбарлари вилоят ҳокимлари билан бирга иссиқлик таъминотидаги 153 та (23 фоиз) қозонхонани ва 2 минг 802 километр (66 фоиз) иссиқлик тармоқларини таъмирлаш, 1 минг 784 та (12 фоиз) кўп қаватли уйни иссиқлик таъминоти билан қамраб олиш бўйича аниқ таклифлар киритиши лозим», – деди Ўзбекистон Президенти.
Йиғилишда маълум бўлишича, Андижонда – 32 та, Наманганда – 27 та, Қашқадарёда – 16 та, Жиззахда – 10 та қозонхона таъмирталаб аҳволда.
«Аҳолига ажратилган маҳаллий кўмирнинг 60 минг тоннаси ҳали эгаларига етказиб берилмасдан, омборларда турибди. Кўмирнинг сифати бўйича ҳам баъзи вилоятларда ҳозиргача эътирозлар бор. Кўмир етказиб беришда кундалик назоратни яна-да кучайтиришимиз ва бу жараённи тизимли йўлга қўйишда учраётган муаммоларни қисқа вақт ичида бартараф этишимиз зарур», – деди Шавкат Мирзиёев.
Ушбу селекторга оид бошқа хабарлар:
- «Электр, табиий ва суюлтирилган газ, иссиқлик таъминотидаги узилишлар ҳамда бензин нархининг ошгани аҳолининг ҳақли эътирозларига сабаб бўлмоқда» – Шавкат Мирзиёев
- Шавкат Мирзиёев электр энергияси бўйича қайси вилоятларда кўп танқислик кузатилаётганлигини маълум қилди
- Шавкат Мирзиёев газ экспортини қисқартириб, аҳоли эҳтиёжларини қондириш бўйича кўрсатма берганини маълум қилди
- Шавкат Мирзиёев электр энергияси, табиий газ ва кўмир таъминотида йўл қўйилаётган ноқонуний хатти-ҳаракатлар ҳақида гапирди
Изоҳ (0)