«Нефтчи» ва «Локомотив» клублари собиқ мураббийи Андрей Фёдоров «СКА-Хабаровск» бош мураббийи Сергей Юраннинг «Спартак» ярим ҳимоячиси Остон Ўрунов ҳақидаги гапларига муносабат билдирди.
— Ўруновни Ўзбекистондаги фаолиятим орқали биламан, у ерда 6 йил ишладим ва айтишим мумкинки, ўзбек футболи ичида бундай ҳолатлар бўлган. У ерда ҳаттоки ўзгартирилган ҳужжатлар учун ўйинчилар дисквалификация қилинганди.Шунинг учун айтишим мумкинки, бундан икки-уч йил олдин Ўзбекистонда бундай ҳолатлар кузатилган. Аммо Ўрунов борасида ҳеч нарса дея олмайман. Бу миш-мишлар узоқ вақтдан бери мавжуд, аммо бу сўзлар, холос. Ўруновни ҳеч ким текширмаган ва аниқ билмайди. Шунинг учун мен Юраннинг сўзларини на тасдиқлай оламан ва на рад эта оламан. Ўрунов 16 ёшида «Навбаҳор»нинг дублида ўйнарди, ўша пайтда менга унинг ўйини ёққанди. Мен уни «Нефтчи»га таклиф қилмоқчи бўлганман, аммо бу амалга ошмаган. Эсимда, уни 2000 йил деб айтишганди. Бўлди, бошқа ҳеч қандай гап бўлмаган.
— Унинг 2000 йил эканлиги сизни ҳайрон қолдирганми?
— Ҳайрон бўлдим, албатта. У аллақачон етилиб бўлганди, унинг ёшида ҳамма ҳам шундай кўринмасди. Аммо мен унинг ёши кичрайтирилган ёки ҳужжатлари қалбакилаштирилган деб ўйламагандим. Шунинг учун буни ҳеч ким айта олмайди. Билмадим, Сергей Юран бу маълумотни қаердан олган.
— Мураббийнинг бутун мамлакатга бундай нарсалар ҳақида гапиришини тўғри деб ўйлайсизми?
— Ростини айтаман. Мен бундай демаган бўлардим. Маълумот шуки, сиз уни ҳеч қанақасига исботлай олмайсиз. Бу миш-миш даражасида. Бу менинг шахсий фикрим.
Аввалроқ Юран ўзбекистонлик футболчи кўрсатилганидан 4-5 ёшга катталигини айтганди.
19 декабрда 20 ёшга тўладиган Ўрунов 2019/20 йилги мавсумнинг иккинчи ярмида «Уфа» сафида РПЛда 10 ўйин ўтказган. Ёзги трансфер ойнасида 19 ёшли футболчи Москванинг «Спартак» жамоасига ўтганди.
Остон Россия чемпионати 2020/21 йилги мавсумида 8 та ўйинда майдонга тушди (бир марта асосий таркибда) ва бирорта ҳам самарали ҳаракат амалга ошира олмади.
Изоҳ (0)