Vazirlar Mahkamasi huzuridagi O‘simliklar karantini davlat inspeksiyasi Rossiya tomonidan “Pomidor jigarrang bujmayish virusi kasalligi” aniqlangani sabab O‘zbekistonning Farg‘ona, Qashqadaryo hamda Navoiy viloyatlaridan ushbu mahsulotlar eksportiga qo‘yilgan taqiqqa yuzasidan bayonot berdi.
Ma’lum qilinishicha, Tomato brown rugose fruit virus — “Pomidor jigarrang bujmayish virusi kasalligi” bilan bog‘liq xabar e’lon qilinganidan so‘ng, “O‘zdavkarantin” inspeksiyasi xodimlari tomonidan tezkorlik bilan “Dolzarb 15 kunlik” chora-tadbirlar rejasi ishlab chiqilgan. Pomidor va qalampir mahsuloti hamda uning eksportiga jiddiy zarar yetkazuvchi ushbu kasallikning alomatlari, tarqalish yo‘llari va qarshi kurash mexanizmi aniq belgilab berilgan. Maxsus ishchi guruhi tuzilib, Farg‘ona viloyatiga holatni chuqurroq o‘rganish va kasallik mavjud bo‘lsa, uni aniqlash maqsadida safarbar etilgan. Shuningdek, respublikaning barcha tuman va shaharlari hamda chegara maskanlarida faoliyat yuritayotgan inspektorlarga maxsus topshiriqlar berilgan.
Ta’kidlanishicha, respublikaning barcha hududlarida yetishtirilayotgan pomidor mahsulotidan namunalar olinib, Markaziy karantin laboratoriyasida o‘rganilmoqda.
“Biz laboratoriya xodimlari bilan mana 10 kundan oshmoqdaki, o‘simliklarga jiddiy ziyon yetkazishi mumkin bo‘lgan zararli organizmlar diagnostikasi ustida trening hamda amaliy o‘rganishlarni olib bormoqdamiz. Shu yilning boshidan buyon dunyoning bir qator davlatlarida qishloq xo‘jaligi mahsulotlari hosili va eksportiga yangi turdagi Tomato brown rugose fruit virus — ‘Pomidor jigarrang bujmayish virusi kasalligi’, ayniqsa Osiyo va Yevropa mamlakatlari orasida jiddiy xavotirlarga sabab bo‘ldi”, — deydi ayni kunlarda laboratoriya xodimlari uchun fitosanitariya diagnostikasi ustida trening olib borayotgan o‘simliklar karantini va himoyasi sohasida xalqaro ekspert doktor Amir Malik Xumayun.
Farg‘ona viloyatida mavjud issiqxonalarning 99,11 gektar maydonini pomidor ekinlari tashkil etib, ularning barchasi sanoat issiqxonalari hisoblanadi. Shundan 36,46 gektarni tashkil etgan 18 ta issiqxonalarda pomidor yetishtirilishi davom etmoqda. Respublika bo‘ylab o‘tkazilgan maxsus fitosanitar dala nazorati chog‘ida barcha issiqxona rahbar va xodimlariga kasallik va zararkunandalar hamda pomidorning jigarrang bujmayish virus kasalligi haqida tushuntirish ishlari olib borilgan.
“Dolzarb 15 kunlik” kunlik doirasida respublikaning Qashqadaryo, Navoiy, Farg‘ona hamda boshqa hududlarida pomidor va qalampir ekilgan har bir issiqxonaning joylashgan o‘rni, maydoni, turi va fitosanitar tozaligi to‘g‘risidagi ma’lumotnomasi, ya’ni pasporti inspeksiya xodimlari tomonidan qayd etilgan. Pomidor va qalampir yetishtiriladigan hududlarda o‘tkazilgan nazorat chog‘ida jalb qilingan sayyor laboratoriyalar shu yerning o‘zida mahsulotlarda “Pomidor jigarrang bujmayish virusi kasalligi” alomatlari bor yoki yo‘qligini tekshiruvdan o‘tkazgan.
“O‘rganishlar shuni ko‘rsatmoqdaki, bugungi kunga qadar respublika hududida ‘Pomidor jigarrang bujmayish virusi kasalligi’ning simptomatik alomatlari aniqlanmagan. Respublikaning virusdan xoli ekanligini tasdiqlash maqsadida har bir hudud kesimida ro‘yxat shakllantirilib, Rossiya tomonga taqdim etilmoqda. Masala yuzasidan muzokaralar davom etmoqda”, — deyiladi xabarda.
Avvalroq Farg‘ona viloyati hokimi Xayrullo Bozorov Rossiyaga yuborilgan pomidordan chiqqan kasallik Farg‘onadagi birorta issiqxonada aniqlanmaganini ma’lum qilgandi.
Mavzuga doir:
Izoh (0)