Вазирлар Маҳкамаси ҳузуридаги Ўсимликлар карантини давлат инспекцияси Россия томонидан «Помидор жигарранг бужмайиш вируси касаллиги» аниқлангани сабаб Ўзбекистоннинг Фарғона, Қашқадарё ҳамда Навоий вилоятларидан ушбу маҳсулотлар экспортига қўйилган тақиққа юзасидан баёнот берди.
Маълум қилинишича, Tomato brown rugose fruit virus — «Помидор жигарранг бужмайиш вируси касаллиги» билан боғлиқ хабар эълон қилинганидан сўнг, «Ўздавкарантин» инспекцияси ходимлари томонидан тезкорлик билан «Долзарб 15 кунлик» чора-тадбирлар режаси ишлаб чиқилган. Помидор ва қалампир маҳсулоти ҳамда унинг экспортига жиддий зарар етказувчи ушбу касалликнинг аломатлари, тарқалиш йўллари ва қарши кураш механизми аниқ белгилаб берилган. Махсус ишчи гуруҳи тузилиб, Фарғона вилоятига ҳолатни чуқурроқ ўрганиш ва касаллик мавжуд бўлса, уни аниқлаш мақсадида сафарбар этилган. Шунингдек, республиканинг барча туман ва шаҳарлари ҳамда чегара масканларида фаолият юритаётган инспекторларга махсус топшириқлар берилган.
Таъкидланишича, республиканинг барча ҳудудларида етиштирилаётган помидор маҳсулотидан намуналар олиниб, Марказий карантин лабораториясида ўрганилмоқда.
«Биз лаборатория ходимлари билан мана 10 кундан ошмоқдаки, ўсимликларга жиддий зиён етказиши мумкин бўлган зарарли организмлар диагностикаси устида тренинг ҳамда амалий ўрганишларни олиб бормоқдамиз. Шу йилнинг бошидан буён дунёнинг бир қатор давлатларида қишлоқ хўжалиги маҳсулотлари ҳосили ва экспортига янги турдаги Tomato brown rugose fruit virus — ‘Помидор жигарранг бужмайиш вируси касаллиги’, айниқса Осиё ва Европа мамлакатлари орасида жиддий хавотирларга сабаб бўлди», — дейди айни кунларда лаборатория ходимлари учун фитосанитария диагностикаси устида тренинг олиб бораётган ўсимликлар карантини ва ҳимояси соҳасида халқаро эксперт доктор Амир Малик Хумаюн.
Фарғона вилоятида мавжуд иссиқхоналарнинг 99,11 гектар майдонини помидор экинлари ташкил этиб, уларнинг барчаси саноат иссиқхоналари ҳисобланади. Шундан 36,46 гектарни ташкил этган 18 та иссиқхоналарда помидор етиштирилиши давом этмоқда. Республика бўйлаб ўтказилган махсус фитосанитар дала назорати чоғида барча иссиқхона раҳбар ва ходимларига касаллик ва зараркунандалар ҳамда помидорнинг жигарранг бужмайиш вирус касаллиги ҳақида тушунтириш ишлари олиб борилган.
«Долзарб 15 кунлик» кунлик доирасида республиканинг Қашқадарё, Навоий, Фарғона ҳамда бошқа ҳудудларида помидор ва қалампир экилган ҳар бир иссиқхонанинг жойлашган ўрни, майдони, тури ва фитосанитар тозалиги тўғрисидаги маълумотномаси, яъни паспорти инспекция ходимлари томонидан қайд этилган. Помидор ва қалампир етиштириладиган ҳудудларда ўтказилган назорат чоғида жалб қилинган сайёр лабораториялар шу ернинг ўзида маҳсулотларда «Помидор жигарранг бужмайиш вируси касаллиги» аломатлари бор ёки йўқлигини текширувдан ўтказган.
«Ўрганишлар шуни кўрсатмоқдаки, бугунги кунга қадар республика ҳудудида ‘Помидор жигарранг бужмайиш вируси касаллиги’нинг симптоматик аломатлари аниқланмаган. Республиканинг вирусдан холи эканлигини тасдиқлаш мақсадида ҳар бир ҳудуд кесимида рўйхат шакллантирилиб, Россия томонга тақдим этилмоқда. Масала юзасидан музокаралар давом этмоқда», — дейилади хабарда.
Аввалроқ Фарғона вилояти ҳокими Хайрулло Бозоров Россияга юборилган помидордан чиққан касаллик Фарғонадаги бирорта иссиқхонада аниқланмаганини маълум қилганди.
Мавзуга доир:
Изоҳ (0)