Samarqand tumanida qishloq xo‘jaligida foydalanilgan yerlarning 161 gektari o‘zboshimchalik bilan egallab olinishi va noqonuniy ravishda uy-joylar qurilishi natijasida davlatga 55,9 milliard so‘mlik zarar yetkazilgan. Holat bo‘yicha “Yermulkkadastr” DUK Samarqand tuman bo‘limi mansabdor shaxslari va boshqalar tergov qilinmoqda. Bu haqda “Daryo”ga viloyat prokuraturasi axborot xizmati xabar berdi.
Ma’lum bo‘lishicha, Payariq tuman Yer resurslari va davlat kadastri bo‘limi boshlig‘i R.R. 92 ta fermer xo‘jaligining 597 gektar yer maydonlariga daraxtzorlar barpo etilishining oldini olish choralarini ko‘rmagan. Hujjatlar soxtalashtirilib, suvli yer maydonlariga g‘alla ekilmaganligi sababli 2,4 milliard so‘mlik iqtisodiy zarar yetkazilgan.
Amin invest international QK MChJ mansabdor shaxslari 1,2 milliard so‘m imtiyozli kredit mablag‘larini MChJ hisob raqamiga o‘tkazib, fermer xo‘jaliklariga mineral o‘g‘it yetkazib bermasdan, ularning juda ko‘p miqdordagi pul mablag‘larini o‘zlashtirish va rastrata qilish orqali talon-toroj qilgan.
Aytilishicha, so‘nggi ikki yilda qishloq xo‘jaligi sohasiga daxldor tashkilot va idoralarning 22 nafar xodimi korrupsiyaviy jinoyatlari uchun javobgarlikka tortilgan. Xususan, Agrosanoat majmui ustidan nazorat qilish inspeksiyasi Urgut tuman bo‘limi katta inspektori M.M. fuqaro A.A.ga traktorchi-mashinist guvohnomasini rasmiylashtirib berish evaziga 800 ming so‘m miqdoridagi pul mablag‘larini pora tariqasida olgan vaqtida ashyoviy dalillar bilan qo‘lga olingan.
Samarqand viloyat prokuraturasi organlari tomonidan Prezidentning 2019-yil 17-iyundagi “Qishloq xo‘jaligida yer va suv resurslaridan samarali foydalanish chora-tadbirlari to‘g‘risida”gi farmoni ijrosi yuzasidan o‘tkazilgan o‘rganish va tekshirishlar natijasida noqonuniy qarorlarni bekor qilish va qonunga muvofiqlashtirish haqida 164 ta protest keltirgan. 22 ta taqdimnoma kiritilib, 60 nafar shaxs ma’muriy hamda intizomiy javobgarlikka tortilgan. 68 ta jinoyat ishi qo‘zg‘atilib, 285 nafar mansabdor shaxs qonunning buzilishiga yo‘l qo‘ymaslik haqida ogohlantirilgan.
Izoh (0)