Самарқанд туманида қишлоқ хўжалигида фойдаланилган ерларнинг 161 гектари ўзбошимчалик билан эгаллаб олиниши ва ноқонуний равишда уй-жойлар қурилиши натижасида давлатга 55,9 миллиард сўмлик зарар етказилган. Ҳолат бўйича «Ермулккадастр» ДУК Самарқанд туман бўлими мансабдор шахслари ва бошқалар тергов қилинмоқда. Бу ҳақда «Дарё»га вилоят прокуратураси ахборот хизмати хабар берди.
Маълум бўлишича, Пайариқ туман Ер ресурслари ва давлат кадастри бўлими бошлиғи Р.Р. 92 та фермер хўжалигининг 597 гектар ер майдонларига дарахтзорлар барпо этилишининг олдини олиш чораларини кўрмаган. Ҳужжатлар сохталаштирилиб, сувли ер майдонларига ғалла экилмаганлиги сабабли 2,4 миллиард сўмлик иқтисодий зарар етказилган.
Amin invest international ҚК МЧЖ мансабдор шахслари 1,2 миллиард сўм имтиёзли кредит маблағларини МЧЖ ҳисоб рақамига ўтказиб, фермер хўжаликларига минерал ўғит етказиб бермасдан, уларнинг жуда кўп миқдордаги пул маблағларини ўзлаштириш ва растрата қилиш орқали талон-торож қилган.
Айтилишича, сўнгги икки йилда қишлоқ хўжалиги соҳасига дахлдор ташкилот ва идораларнинг 22 нафар ходими коррупциявий жиноятлари учун жавобгарликка тортилган. Хусусан, Агросаноат мажмуи устидан назорат қилиш инспекцияси Ургут туман бўлими катта инспектори М.М. фуқаро А.А.га тракторчи-машинист гувоҳномасини расмийлаштириб бериш эвазига 800 минг сўм миқдоридаги пул маблағларини пора тариқасида олган вақтида ашёвий далиллар билан қўлга олинган.
Самарқанд вилоят прокуратураси органлари томонидан Президентнинг 2019 йил 17 июндаги «Қишлоқ хўжалигида ер ва сув ресурсларидан самарали фойдаланиш чора-тадбирлари тўғрисида»ги фармони ижроси юзасидан ўтказилган ўрганиш ва текширишлар натижасида ноқонуний қарорларни бекор қилиш ва қонунга мувофиқлаштириш ҳақида 164 та протест келтирган. 22 та тақдимнома киритилиб, 60 нафар шахс маъмурий ҳамда интизомий жавобгарликка тортилган. 68 та жиноят иши қўзғатилиб, 285 нафар мансабдор шахс қонуннинг бузилишига йўл қўймаслик ҳақида огоҳлантирилган.
Изоҳ (0)