Ижарадаги уй, ҳашаматли машиналар ва хайриялар. «Манчестер Сити» «мияси» Кевин де Брюйне қандай ҳаёт кечиради?

Хосеп Гвардиола «Манчестер Сити»сининг асосий «мияси» бўлган Кевин де Брюйне ҳар доим майдонда ўта интизомли футболчи сифатида таассурот қолдирган ва ҳеч ким билан кескин низоларга бормаган. Хўш, «шаҳарликлар» юлдузи майдон ташқарисида ҳам шундайми, у қандай ҳаёт кечиради? Қуйида айнан ушбу саволларга жавоб беришга ва унинг ҳашаматли ҳаёти ҳақида ҳикоя қилишга ҳаракат қиламиз.

Қаерда яшайди?

Кутилганидек, Кевин ўз даражасидаги бошқа футболчилар билан солиштирганда, нисбатан камтарона ҳаёт кечиради. Футболчи оиласи билан Манчестер яқинида, клуб томонидан ижарага берилган уйда истиқомат қилади.

Уй икки қаватдан иборат бўлиб, ҳовли ва ичкарида сузиш ҳавзалари мавжуд. Шунингдек, бир қанча ётоқхона, меҳмонхона ва, албатта, ошхона бор. Бундан ташқари уйда болалар майдончасини ҳам кўриш мумкин.

Машиналар

Уй ўзиники бўлмаса-да, Кевин ажойиб автопаркнинг эгаси ҳисобланади.

Унинг гаражидаги биринчи машина, нархи 100 минг долларлик Mercedes-Benz GLE Coupe 350 D. Ушбу машина 249 от кучига эга ва 7 сонияда 100 км/соат тезликкача етиши мумкин. Автомобильнинг максимал тезлиги эса 226 км/соатни ташкил этади.

Ўйинчининг иккинчи автоулови Range Rover бўлиб, у де Брюйнега 200 минг долларга тушган. Range’нинг максимал тезлиги 220 км/соатни ташкил этиб, унинг спидометридаги кўрсаткич 6,8 сония ичида 100 чизиғига етиши мумкин.

Mercedes-Benz G63 Кевиннинг учинчи автомобили ҳисобланади. Ушбу «тойчоқ» учун футболчи 150 минг доллардан воз кечган. Унинг максимал тезлиги соатига 230 кмга етиши мумкин.

Шахсий ҳаёти

Футболчи 2014 йилда ватандоши Мишел Лакруа исмли қиз билан Генк (Бельгия) шаҳрида танишади. 2016 ва 2018 йилларда икки бор ўғил фарзанд кўрган жуфтлик 2017 йилнинг июнь ойида муносабатларини расмийлаштирган.

Дўстлари

Кевин жуда камтар ва ёпиқ одам бўлгани учун дўстларининг сони билан мақтана олмайди. Унинг футбол оламидаги ягона дўсти Раҳим Стерлинг.

Футболчилар 2015 йилда, «Манчестер Сити»га ўтган вақтларида танишган, аммо бу вақт дўст тутиниш учун етарли бўлди. Интервьюларидан бирида Кевин Раҳим ҳақида шундай деганди: «Биз Раҳим билан яхши алоқаларга эгамиз, чунки иккимиз ҳам «Сити»га деярли бир вақтда келганмиз. Матбуотда бизни аёвсиз танқид қилишарди. Улар мени «Челси»дан ҳайдалган омадсиз деган бўлса, Раҳимни пул учун «Ливерпуль»ни ташлаб кетишда айбларди. У билан машғулотдан сўнг суҳбатлашдик ва унинг жуда яхши йигит эканини ва у ҳақидаги гаплар нотўғри эканини англаб етдим. Раҳим мен футболда учратган энг яхши ва камтар йигитлардан бири».

Футболдан ташқари қизиқишлар

Кевин юлдуз бўлишига қарамай ҳеч қачон қўполлик ва такаббурлик билан ажралиб турмаган. Футболчи бўш вақтларида ночорларга ёрдам беришни жуда яхши кўради ва ҳатто бир неча бор Африкага ҳам борган. «Биз учун сув худди ҳаво каби дунёдаги энг оддий нарса, аммо Сенегалда бундай эмас. Имкони бўлган ҳар бир киши уларга ёрдам бериши керак», — дейди де Брюйне Африкадаги ҳаёт ҳақида. Шунингдек, Кевин хайрия ишлари билан шуғулланади ва бошқаларни ҳам эзгу ишларга чорлайди.

Даромади қанча?

Кевиннинг «шаҳарликлар» билан амалдаги шартномаси 2023 йилнинг ёзигача мўлжалланган, унга кўра, бельгияликнинг бир йиллик маоши 15 миллион еврони ташкил қилади. Бундан ташқари барча таниқли футболчилар сингари, де Брюйне ҳам турли хил бонуслар ва реклама шартномаларидан қўшимча даромад кўради.