Korrupsiyaga qarshi kurashish agentligi direktori Akmal Burhonov O‘zbekistondagi qaysi sohalarda korrupsiyaviy xavf-xatar yuqori ekanini ma’lum qildi, deya xabar bermoqda “Kun.uz”.
“Hozir biz tadqiqotlar o‘tkazyapmiz. Ya’ni har bir sohadagi korrupsiya zanjirini, qaysi sohalarda eng ko‘p korrupsiya xavfi mavjudligini o‘rganyapmiz. Albatta, ijtimoiy sohada korrupsiyaviy xavf-xatarlar eng ko‘pligini ko‘ryapmiz.
Afsuski, u yoki bu sohada ishlaydiganlarning oyliklari kam bo‘lsa, o‘sha yerda korrupsion xavf-xatarlar ko‘proq uchramoqda. Umuman, sohalar tanlab olingan. Bu – doim aytib kelinadigan ta’lim, sog‘liqni saqlash, qurilish va pandemiya davrida eng ko‘p korrupsiya alomatlari kuzatilgan davlat xaridlari sohalaridir.
Biz bu muammolarni o‘rganyapmiz. Kuni kecha Oliy Majlis Qonunchilik palatasida amaldagi qonun hujjatlariga davlat xaridlari to‘g‘risidagi qonunchilikni buzganlik uchun javobgarlik masalasi kiritildi, qonun loyihasi deputatlar tomonidan birinchi o‘qishda qabul qilindi.
Hozircha faqat ma’muriy javobgarlik masalasi kiritilmoqda. Biz endi davlat xaridlari sohasidagi qonunchilikni buzganlik uchun jinoiy javobgarlikka tortish masalasini ham qonunchilikka kiritish, umuman, bu boradagi qonunchilikni takomillashtirish ustida ishlayapmiz”, – deydi Korrupsiyaga qarshi kurash agentligi direktori.
Avvalroq Akmal Burhonov davlat amaldorlarining xorijda aktivlar sotib olishini tartibga solish vaqti kelgani hamda korrupsionerlar shaxsi haqidagi ma’lumotlar e’lon qilib boriladigan platforma ishlab chiqilayotganini ma’lum qilgandi.
Izoh (0)