Markaziy bank boshqaruvi 10-dekabr kuni asosiy stavkani o‘zgarishsiz, yillik 14 foiz darajasida saqlab qolish to‘g‘risida qaror qabul qildi, deb xabar bermoqda bank matbuot xizmati.
“Ushbu qaror 2020-yildagi pul-kredit siyosati yumshatilishining iqtisodiyotga ta’sirini saqlab qolish, shuningdek, makroiqtisodiy barqarorlikni ta’minlash va 2021-yilning I yarmida iqtisodiy faollik tiklanishining davom etishini qo‘llab-quvvatlashga qaratilgan nisbatan qat’iy pul-kredit sharoitlarini ta’minlash maqsadida qabul qilindi”, — deya izoh bergan Markaziy bank.
Qayd etilishicha, Markaziy bank hukumat bilan birgalikda inflyatsiyaning 2021-yilga mo‘ljallangan yillik 10 foizdan past oraliq maqsadli ko‘rsatkichiga erishish uchun barcha zaruriy choralarni ko‘rib boradi.
Eslatib o‘tamiz, Markaziy bank boshqaruvining 14-apreldagi qarori bilan asosiy stavka 1 foizga pasaytirilib, yillik 15 foiz darajasida belgilangan edi. Iyun oyida esa Markaziy bank asosiy stavkani pasaytirishi haqida xabarlar tarqaldi, biroq 11-iyun kuni asosiy stavka bo‘yicha qaror qabul qilingan va u 15 foiz miqdorida o‘zgarishsiz qoldirilgandi. 10-sentabr kuni Markaziy bank boshqaruvi asosiy stavkani 1 foizga pasaytirib, 14 foiz etib belgiladi, 22-oktabrda ham asosiy stavkani yillik 14 foiz darajasida o‘zgarishsiz saqlab qolgandi.
Izoh (0)