“Foton” AJning davlatga tegishli aksiyalar paketini rossiyalik investorlarga sotish taklif qilinmoqda. Bu kabi taklifni “O‘zeltexsanoat” assotsiatsiyasining birinchi o‘rinbosari Mansur Hoshimov Toshkentda o‘tkazilgan uchrashuvda Rossiya tomoniga bildirgan, deb xabar beradi “Gazeta.uz”.
Mansur Hoshimovning so‘zlariga ko‘ra, ishlab chiqarilgan yarimo‘tkazgichli mahsulotlar hukumatlararo kelishuv doirasida mudofaa sanoati korxonalari ehtiyojlari uchun Rossiyaga to‘liq eksport qilinmoqda. 2020-yilning yanvar—noyabr oylarida jami 1,17 million dollarlik mahsulot eksport qilingan (2019-yilda — 1,33 million dollarlik).
“Korxonaning elektron qurilmalarni ishlab chiqarishdagi uzoq yillik tajribasini, sohadagi malakali texnik mutaxassislar mavjudligini, shuningdek, Rossiya O‘zbekistonning strategik muhim ahamiyatga ega ittifoqdoshi ekanligini inobatga olgan holda ‘Foton’ning 85,15 foiz miqdordagi aksiyalar paketini sotib olish imkoniyatini taklif qilmoqchimiz”, — deydi Mansur Hoshimov.
Shuningdek, u “Foton” bazasida mudofaa kompleksi va xalq xo‘jaligi korxonalari uchun elektron qurilmalar hamda mahsulotlarni ishlab chiqarishni tashkillashtirishni taklif etgan: mikrosxemalar, yuqori voltli to‘g‘irlagich ustunlar, yarim o‘tkazgichli to‘g‘irlagich va kuch diodlarini, maydon tranzistorlari, operatsion kuchaytirgichlar va hokazo.
Bundan tashqari, keyinchalik Rossiyada sanoat korxonalari ehtiyojlari uchun yetkazib berish bilan O‘zbekiston hududida ishlab chiqarishni rivojlantirishni yo‘lga qo‘yish maqsadida zamonaviy elektron komponentlar (mikrosxemalar va boshqalar)ning yangi ishlanmalari va texnologiyalarini taqdim etish taklifi bildirildi.
Eslatib o‘tamiz, “Foton” maqsadli dasturlar orqali ommaviy kimoshdi savdosiga qo‘yilgan 62 ta davlat aktivi ro‘yxatiga kiritilgan edi.
Ma’lumot uchun, “Foton” zavodiga 1942-yilda asos solingan bo‘lib, hozirda 68 ming metr kvadratga yaqin maydonda ikkita ishlab chiqarish binosiga ega. Davlat 257 mutaxassis ishlaydigan korxonaning 83,15 foiz aksiyalariga egalik qiladi.
Izoh (0)