Davlat soliq qo‘mitasi “Umumiy ovqatlanish korxonalarining mavsumiy kafelari ishlashi, shuningdek, ko‘chma savdoni amalga oshirish tartibini tasdiqlash to‘g‘risida”gi Vazirlar Mahkamasi qarori loyihasini muhokamaga qo‘ydi.
Hujjat bilan 2021-yil 1-iyuldan boshlab tadbirkorlik subyektlari tomonidan ko‘chma savdo obyektlarini elektron tarzda K- SAVDO avtomatlashtirilgan axborot tizimida ro‘yxatdan o‘tkazish yo‘li bilan amalga oshirish taklif etilgan. Mazkur tizim ko‘chma savdo obyektlarini ro‘yxatdan o‘tkazish uchun buyurtma berish, aholi punktining interaktiv xaritasiga kiritilgan ko‘chma savdo joylarining sxemalariga muvofiq elektron auksionlarni amalga oshirish, ro‘yxatga olish uchun to‘lovlarni amalga oshirish, shuningdek, pul mablag‘larini qaytarish imkonini beradi.
Qaror nizomida ta’kidlanishicha, umumiy ovqatlanish korxonalarining mavsumiy kafelari — kapital qurilish obyekti bo‘lmagan va uni joylashtirish uchun statsionar joydan 5 metrdan oshmaydigan masofada joylashgan, ovqatlanish va dam olishi paytida iste’molchilarga qo‘shimcha xizmat ko‘rsatish uchun mo‘ljallangan, tasdiqlangan talablarga muvofiq jihozlangan, qurilishga ruxsat olish talab qilinmaydigan, umumiy ovqatlanish korxonalari tomonidan xizmat ko‘rsatuvchi bino yoki inshootlar hisoblanadi.
Hujjat bilan umumiy ovqatlanish korxonalarida mavsumiy kafelarni 1-apreldan 1-noyabrgacha bo‘lgan vaqt oralig‘ida joylashtirish, mavsumiy kafeni o‘rnatish — 15-mart kunigacha, mavsumiy kafeni qismlarga ajratish (demontaj) qilish — 15-noyabrdan kechiktirmay amalga oshirish taklif etilmoqda. Mavsumiy kafening maydoni u joylashgan statsionar ovqatlanish korxonasi maydonidan oshmasligi kerak.
Mavsumiy kafeni asfaltlanmagan (muhrlanmagan) yuzalar ustiga, o‘t qoplami yoki maysazor ustiga joylashtirish faqat texnologik maydoncha o‘rnatilgan taqdirda amalga oshiriladi.
Mavsumiy kafelarni joylashtirishga quyidagi hollarda ruxsat berilmaydi:
- maket tomonidan belgilangan chegaralardan tashqarida;
- metroning texnik vositalaridan 25 metrlik masofada;
- metroning stansiyalari va piyodalar o‘tish joylaridan 25 metrlik masofada;
- binolarning arklarida, gulzorlarda, o‘yin maydonchalarida (bolalar, dam olish, sport, shahar transport parklari uchun);
- turar joy bo‘lmagan binolarning birinchi qavatlaridan yuqorida joylashgan va alohida kirish joyi bo‘lmagan statsionar ovqatlanish korxonalari bo‘lgan yer uchastkalarida;
- shahar bo‘ylab yo‘lovchilar transportining to‘xtash joylarida;
- piyodalarning yerosti va yerusti o‘tish joylaridan 5 metrli zonada;
- turar joy binolarining tomlarida hamda ularga o‘rnatilgan va biriktirilgan binolarda.
- g‘isht, qurilish bloklari va plitalar, monolit beton, temir-beton, po‘lat profilli plitalar, banner matodan foydalanish;
- yerosti kommunal xo‘jaliklarini yotqizish va kapital xarakterdagi qurilish-montaj ishlarini amalga oshirish;
- oyna va eshik bloklari (ramka oynalar), qattiq metall panellar, tarmoq paneli va oynalar yordamida uskunalar elementlari orasidagi oraliqni to‘ldirish (alyumin profildan yasalgan, yengil ko‘chma konstruksiya bundan mustasno);
- kafe uskunalari va ayvon elementlarini kafel, metall, shuningdek, tom yopish materiallari, asbest-sement qorishmalaridan foydalanish.
- chakana savdo sohasida qonun hujjatlariga, sanitariya qoidalari va normalariga rioya qilish;
- nazorat-kassa mashinalari, qonun hujjatlarida nazarda tutilgan hollarda esa onlayn nazorat-kassa mashinalari yoki virtual kassalar va bank plastik kartochkalaridan foydalangan holda to‘lovlarni qabul qilish uchun hisob-kitob terminalining mavjudligi. Ushbu talab savdo avtomatlariga nisbatan tatbiq etilmaydi;
- ko‘chma savdo obyektlari yaqinida maishiy chiqindilarni yig‘ish uchun chiqindi qutilarini o‘rnatish;
- tovarlarni ko‘chma savdo obyektlari orqali va ro‘yxatdan o‘tilgan joyda sotish.
Eslatib o‘tamiz, Prezident Shavkat Mirziyoyev 20-iyul kuni koronavirus pandemiyasining salbiy ta’sirini kamaytirish uchun aholi, umumiy ovqatlanish, savdo va xizmat ko‘rsatish sohasidagi tadbirkorlik subyektlarini qo‘llab-quvvatlash bo‘yicha qo‘shimcha chora-tadbirlar to‘g‘risidagi farmoni bilan O‘zbekistonda 2021-yil 1-iyulga qadar umumiy ovqatlanish korxonalariga yozgi terrasalarni saqlab qolishga ruxsat berilgan edi.
Izoh (0)