Adliya vazirligida 9-dekabr, chorshanba kuni Oliy Majlis Senati raisi Tanzila Norboyeva rahbarligida oila qonunchiligini takomillashtirish masalalariga bag‘ishlangan yig‘ilish o‘tkazildi. Unda Oliy Majlis Qonunchilik palatasi deputatlari, vazirlik va idoralar rahbarlari, nodavlat notijorat tashkilot vakillari hamda boshqa soha mutaxassislari ishtirok etdi. Bu haqda Adliya vazirligining matbuot xizmatiga tayanib “Gazeta.uz” xabar qildi.
Yig‘ilish davomida adliya vaziri Ruslanbek Davletov aliment to‘lash amaliyoti bo‘yicha joriy holat hamda ushbu masala bo‘yicha xorijiy davlatlar tajribasini tahliliy qiyoslab, sohani takomillashtirish bo‘yicha bir qancha takliflarni ilgari surdi.
Yig‘ilishda majburiy oilaga tayyorlov kurslarini bepul asosda joriy etish, nikohlanuvchi shaxslarni bepul asosda bepushtlik yuzasidan tibbiy ko‘rikdan o‘tkazish, nikohning dastlabki 3 yilligida yosh oilalarning moddiy farovonligini ta’minlash maqsadida imtiyozli kreditlar ajratishga kelishib olindi.
Shuningdek, aliment to‘lashdan bo‘yin tovlagan shaxslarga nisbatan majburiy jamoat ishlari hamda transport vositasini boshqarish huquqini vaqtincha cheklash shaklidagi ta’sir choralarini qo‘llash bo‘yicha bildirilgan takliflar yuzasidan normativ-huquqiy hujjat loyihasi ishlab chiqish rejalashtirildi.
Avvalroq otasi aliment to‘lamagani sababli Rossiyada chiqindi yig‘ib yurgan 11 yoshli qashqadaryolik bolaning onasiga aliment pullari undirib berilgani, Samarqandda qariyb 93 million so‘m aliment pulini to‘lamagan ota 15 sutkaga qamalgani hamda 105 million so‘m aliment pulini to‘lamagan qashqadaryolik otaga jinoyat ishi qo‘zg‘atilgani haqida xabar berilgandi.
Izoh (0)