9-dekabrga o‘tar kechasi taxminan soat 01:00 atrofida Andijon shahri Qo‘shariq dahasidagi 24-A uyning 48-xonadonida yong‘in ro‘y berdi, deb xabar qiladi “Kun.uz”. Ma’lum bo‘lishicha, xonaga tabiiy gaz to‘planib qolgan va uy egasi chiroqni yoqqach, chaqnash ro‘y berib, yong‘in kelib chiqqan.
Yong‘in xabari Andijon viloyati favqulodda vaziyatlar boshqarmasi navbatchilik qismiga kelib tushgach, yong‘in xavfsizligi xodimlari hodisa joyiga darhol yetib borgan va soat 01:16 da yong‘in bartaraf etilgan.
Ma’lum qilinishicha, uy egasi gaz to‘plangan xonada chiroqni yoqib yuborishi natijasida chaqnash hodisasi ro‘y berib, yong‘in sodir bo‘lgan. Yong‘in oqibatida 48-xonadonda yashovchi uch nafar fuqaro turli darajada tan jarohati olib, shifoxonaga yotqizilgan. Andijon shahar favqulodda vaziyatlar bo‘limi boshlig‘i o‘rinbosari, mayor Muhammadamin Usmonovning so‘zlariga ko‘ra, ayni paytda holat yuzasidan tergovga qadar tekshiruv ishlari olib borilmoqda.
Andijon shahri hokimi o‘rinbosari, Mahalla va oilani qo‘llab-quvvatlash bo‘limi boshlig‘i Mohinur Qosimova yong‘in oqibatida zarar ko‘rganlar viloyat hokimi tomonidan to‘liq boshqa joyga ko‘chirilib, uylarini ta’mirlash uchun 5 ta qurilish brigadasi ish boshlaganini bildirgan.
Qayd etilishicha, bir hafta muddat ichida mazkur xonadonlar to‘liq ta’mirdan chiqarilib, xonadon egalari qayta ko‘chib kiradi.
“Mutaxassislar bilan kelib o‘rganganimizda xonadonning ichidan gaz so‘rg‘ich chiqdi. Tarmoqda bosimning pasayib ketishi oqibatida fuqaro gaz so‘rg‘ichdan foydalangan. Gaz so‘rg‘ichni rezina shlang orqali qo‘ygan. Rezina shlangdan gaz sizib chiqishi oqibatida xonadonga is gazi to‘lib, elektrni yoqqanda chaqnash sodir bo‘lgan.
Hozir magistral quvurlarida gaz bosimi ozgina pasayishi kuzatilyapti. Biz birinchi navbatda shahar hududidagi ko‘p qavatli uylarni gaz bilan ta’minlashga e’tibor qaratyapmiz. Kecha kechki payt me’yorlashtirish ishlarini olib borib, bu yerda gaz ta’minotini bir me’yorga keltirganmiz.
Lekin bu gazga ham qanoat qilmasdan fuqarolar tomonidan gaz so‘rg‘ich qo‘yib olish holatlari kuzatilyapti. Ko‘chada gaz to‘ldirish shoxobchalarini ham belgilangan soatda o‘chirib, bundan tejab qolinayotgan gaz hajmini asosan shahardagi ko‘p qavatli uylarga qaratyapmiz”, — deydi Andijon shahargaz bo‘limi boshlig‘i Xurshidbek Qodirov.
Avvalroq Qibraydagi xonadonda gaz portlashi oqibatida uy egasi va uning o‘g‘li halok bo‘lgani, shuningdek, Yangiyo‘ldagi xonadonda gaz portlashi oqibatida ikki kishi halok bo‘lgani, uyning bir qismi qulab tushgani to‘g‘risida xabar berilgandi.
Izoh (0)