O‘zbekistonda Energetika vazirligi talablarini bajarmagan gaz quyish shoxobchalariga gaz yetkazib berish to‘xtatiladi. Bu haqda Behzod Normatov Zo‘rTV telekanaliga bergan intervyusida aytib o‘tdi.
“Birinchi navbatda aholi va ijtimoiy obyektlarga gazni bir maromda yetkazib berishni ta’minlashimiz kerak. Gaz tizimidan intensiv ravishda foydalanadigan iste’molchilarni birinchi navbatda o‘chirishga majburmiz.
Avtomobillarga gaz kompressorlari orqali quyish shoxobchalarini soat 17:00 dan 05:00 gacha qisqartirish rejalashtirilgan. Bu orqali gazning aholiga yetib borishini ta’minlashimiz zarur”, — dedi energetika vaziri o‘rinbosari.
Vazir o‘rinbosarining aytishicha, gaz hajmini o‘lchagichlarni ulanish nuqtasiga olib chiqishi kerak bo‘lgan, lekin bu talabni bajarmagan gaz quyish shoxobchalarga nisbatan qat’iy chora ko‘riladi. Prezident qaroridagi punktlarni bajarmagan gaz quyish shoxobchalari to talablarni bajarmagunicha o‘chirib qo‘yiladi.
Avvalroq Buxoroda aholi gaz yo‘qligi sabab yo‘lni to‘sib qo‘ygani, Namangandagi gaz-zapravkada haydovchilar navbat talashib mushtlashgani hamda Toshkentdagi metan zapravkalarning ishlash vaqtiga cheklov o‘rnatilgani haqida xabar berilgandi.
Izoh (0)