Давлат солиқ қўмитаси «Умумий овқатланиш корхоналарининг мавсумий кафелари ишлаши, шунингдек, кўчма савдони амалга ошириш тартибини тасдиқлаш тўғрисида»ги Вазирлар Маҳкамаси қарори лойиҳасини муҳокамага қўйди.
Ҳужжат билан 2021 йил 1 июлдан бошлаб тадбиркорлик субъектлари томонидан кўчма савдо объектларини электрон тарзда K-SAVDO автоматлаштирилган ахборот тизимида рўйхатдан ўтказиш йўли билан амалга ошириш таклиф этилган. Мазкур тизим кўчма савдо объектларини рўйхатдан ўтказиш учун буюртма бериш, аҳоли пунктининг интерактив харитасига киритилган кўчма савдо жойларининг схемаларига мувофиқ электрон аукционларни амалга ошириш, рўйхатга олиш учун тўловларни амалга ошириш, шунингдек, пул маблағларини қайтариш имконини беради.
Қарор низомида таъкидланишича, умумий овқатланиш корхоналарининг мавсумий кафелари — капитал қурилиш объекти бўлмаган ва уни жойлаштириш учун стационар жойдан 5 метрдан ошмайдиган масофада жойлашган, овқатланиш ва дам олиши пайтида истеъмолчиларга қўшимча хизмат кўрсатиш учун мўлжалланган, тасдиқланган талабларга мувофиқ жиҳозланган, қурилишга рухсат олиш талаб қилинмайдиган, умумий овқатланиш корхоналари томонидан хизмат кўрсатувчи бино ёки иншоотлар ҳисобланади.
Ҳужжат билан умумий овқатланиш корхоналарида мавсумий кафеларни 1 апрелдан 1 ноябргача бўлган вақт оралиғида жойлаштириш, мавсумий кафени ўрнатиш — 15 март кунигача, мавсумий кафени қисмларга ажратиш (демонтаж) қилиш — 15 ноябрдан кечиктирмай амалга ошириш таклиф этилмоқда. Мавсумий кафенинг майдони у жойлашган стационар овқатланиш корхонаси майдонидан ошмаслиги керак.
Мавсумий кафени асфальтланмаган (муҳрланмаган) юзалар устига, ўт қоплами ёки майсазор устига жойлаштириш фақат технологик майдонча ўрнатилган тақдирда амалга оширилади.
Мавсумий кафеларни жойлаштиришга қуйидаги ҳолларда рухсат берилмайди:
- макет томонидан белгиланган чегаралардан ташқарида;
- метронинг техник воситаларидан 25 метрлик масофада;
- метронинг станциялари ва пиёдалар ўтиш жойларидан 25 метрлик масофада;
- биноларнинг аркларида, гулзорларда, ўйин майдончаларида (болалар, дам олиш, спорт, шаҳар транспорт парклари учун);
- турар жой бўлмаган биноларнинг биринчи қаватларидан юқорида жойлашган ва алоҳида кириш жойи бўлмаган стационар овқатланиш корхоналари бўлган ер участкаларида;
- шаҳар бўйлаб йўловчилар транспортининг тўхташ жойларида;
- пиёдаларнинг ерости ва ерусти ўтиш жойларидан 5 метрли зонада;
- турар жой биноларининг томларида ҳамда уларга ўрнатилган ва бириктирилган биноларда.
- ғишт, қурилиш блоклари ва плиталар, монолит бетон, темир-бетон, пўлат профилли плиталар, баннер матодан фойдаланиш;
- ерости коммунал хўжаликларини ётқизиш ва капитал характердаги қурилиш-монтаж ишларини амалга ошириш;
- ойна ва эшик блоклари (рамка ойналар), қаттиқ металл панеллар, тармоқ панели ва ойналар ёрдамида ускуналар элементлари орасидаги оралиқни тўлдириш (алюмин профилдан ясалган, енгил кўчма конструкция бундан мустасно);
- кафе ускуналари ва айвон элементларини кафель, металл, шунингдек, том ёпиш материаллари, асбест-цемент қоришмаларидан фойдаланиш.
- чакана савдо соҳасида қонун ҳужжатларига, санитария қоидалари ва нормаларига риоя қилиш;
- назорат-касса машиналари, қонун ҳужжатларида назарда тутилган ҳолларда эса онлайн назорат-касса машиналари ёки виртуал кассалар ва банк пластик карточкаларидан фойдаланган ҳолда тўловларни қабул қилиш учун ҳисоб-китоб терминалининг мавжудлиги. Ушбу талаб савдо автоматларига нисбатан татбиқ этилмайди;
- кўчма савдо объектлари яқинида маиший чиқиндиларни йиғиш учун чиқинди қутиларини ўрнатиш;
- товарларни кўчма савдо объектлари орқали ва рўйхатдан ўтилган жойда сотиш.
Эслатиб ўтамиз, Президент Шавкат Мирзиёев 20 июль куни коронавирус пандемиясининг салбий таъсирини камайтириш учун аҳоли, умумий овқатланиш, савдо ва хизмат кўрсатиш соҳасидаги тадбиркорлик субъектларини қўллаб-қувватлаш бўйича қўшимча чора-тадбирлар тўғрисидаги фармони билан Ўзбекистонда 2021 йил 1 июлга қадар умумий овқатланиш корхоналарига ёзги террасаларни сақлаб қолишга рухсат берилган эди.
Изоҳ (0)