Toshkentdagi Qatortol ko‘chasi namunaviy ko‘chaga aylantiriladi. Bu haqda Chilonzor tuman hokimligi matbuot xizmati xabar berdi.
Ma’lum qilinishicha, Chilonzor tumanining 2020-yil uchun mo‘ljallangan dasturiga tumandagi bir qator serqatnov yo‘llar, ichki va tashqi ko‘chalarni ta’mirlash masalasi ham kiritilgan bo‘lib, bugungi kunga kelib mazkur dastur asosida joylarda ta’mirlash ishlari boshlab yuborilgan.
9-dekabr kuni tuman hokimi Sarvar Mahametov, hokimning arxitektura, kapital qurilish va kommunikatsiyalarni rivojlantirish bo‘yicha o‘rinbosari Azizxon Usmonov va boshqa tegishli mas’ullar namunaviy ko‘chaga aylantirilishi rejalashtirilgan Qatortol ko‘chasida olib borilayotgan ta’mirlash jarayonlarini joyiga chiqqan holda o‘rgandi.
Ta’kidlanishicha, o‘rganishlar jarayonida mas’ullarga tegishli taklif va tavsiyalar berilgan.
Eslatib o‘tamiz, 2020-yilning iyun oyida Chilonzor tumanidagi eng serqatnov ko‘chalardan biri hisoblangan Qatortol ko‘chasida 2560 kvadrat metr asfalt yotqizilgani, Cho‘ponota ko‘chasining 8100 kvadrat metr maydoni ham yangidan asfalt qilingani to‘g‘risida xabar berilgandi.
Izoh (0)