Investitsiyalar va tashqi savdo vazirligi “Toshkent shahrini kompleks ijtimoiy-iqtisodiy rivojlantirish hamda tadbirkorlik va innovatsion faoliyatni qo‘llab-quvvatlash bo‘yicha qo‘shimcha chora-tadbirlar to‘g‘risida”gi Prezident qarori loyihasini jamoatchilik muhokamasi uchun e’lon qildi.

Foto: “Daryo”

Hujjatga asosan, bir oy ichida 2020—2030-yillarda Toshkent shahrining yo‘l-transport infratuzilmasini rivojlantirish konsepsiyasi loyihasini ishlab chiqish va Vazirlar Mahkamasiga kiritish rejalashtirilmoqda.

Shuningdek, 2020—2030-yillarda Toshkent shahrining yo‘l-transport infratuzilmasi obyektlarini qurish va rekonstruksiya qilish bo‘yicha loyihalarni amalga oshirish uchun 15 yillik muddatga 200 million dollargacha qiymatda O‘zbekiston hukumatining kafolati ostida Fransiya taraqqiyot agentligi va boshqa xalqaro moliyaviy institutlar va xorijiy davlatlarning moliya tashkilotlarining qarz mablag‘larini jalb etish ko‘zda tutilmoqda.

Bundan tashqari, Toshkent shahrining Bektemir va Sirg‘ali tumanlari hududlaridan oqib o‘tuvchi Chirchiq daryosi qirg‘og‘ining 16 kilometrlik qismini 65-80 metrgacha toraytirish va toraytirish natijasida hosil bo‘lgan bo‘sh yer maydonlarini elektron auksion orqali sotish ham rejalashtirilgan.

Qaror loyihasiga ko‘ra, 2020—2021-yillarda Toshkent shahrida umumiy uzunligi 656 kilometr bo‘lgan piyodalar va velosipedlar yurish yo‘llarini qurish rejalashtirilmoqda.

Moliya vazirligi Toshkent shahar hokimligiga mazkur loyihalarni amalga oshirish bilan bog‘liq bo‘lgan xarajatlar uchun 2023-yilgacha muddatga 1 trillion so‘m foizsiz ssuda ajratishi nazarda tutilgan.