O‘zbekiston OTMlariga kirishda keyingi yilda o‘tkaziladigan imtihonlarda foydalaniladigan darsliklar ro‘yxati e’lon qilindi

Davlat test markazi 2020/2021-o‘quv yilida umumta’lim maktablari, akademik litsey va kasb-hunar maktablarida qo‘llanilayotgan darslik va o‘quv-metodik qo‘llanmalar ro‘yxatini e’lon qildi. Bu haqda DTM matbuot xizmati ma’lum qildi.

Qayd etilishicha, adabiyotlar ro‘yxati DTMning Xalq ta’limi hamda Oliy va o‘rta maxsus ta’lim vazirliklariga qilgan murojaatiga javoban mazkur vazirliklardan kelgan xatlar asosida shakllantirilgan.

Darsliklar ro‘yxatini har bir fan bo‘yicha alohida shaklda tegishli fan va tilni tanlagan holda quyidagi havola orqali yuklab olish mumkin. Darsliklarning elektron formatini esa Xalq ta’lim vazirligining axborot-ta’lim portalidan yuklab olish imkoniyati mavjud.

Eslatib o‘tamiz, O‘zbekistonda 2021-yil 1-yanvardan davlat OTMlariga kirish uchun test sinovi materiallarining ma’no-mazmuni umumiy o‘rta ta’lim tizimidagi fanlarning o‘quv dasturlariga moslashtiriladi. Test sinovi topshiriqlari davlat ta’lim standartlari va o‘quv dasturlari asosida tuziladi.