Sirdaryo viloyati Guliston shahrida Shavkat Mirziyoyevning 2018-yil 2-avgustdagi “Respublika hududlarida ‘Business City’ zamonaviy ishbilarmonlik markazlarini tashkil etish chora-tadbirlari to‘g‘risida”gi farmoni ijrosi doirasida “Guliston Business City” rahbariyati tomonidan zamonaviy biznes markazining qurilish konsepsiyasi ishlab chiqiladi, deya xabar bermoqda O‘zA.
Umumiy maydoni 70 gektarni tashkil etgan biznes markazida zamonaviy standartlarga javob beruvchi ko‘p qavatli uylar, ijtimoiy soha obyektlaridan maktab, muzey, sport va tibbiyot markazlari, bank, mehmonxona, davlat idoralari, ofis, maishiy va xizmat ko‘rsatish markazlari, ko‘ngilochar joylar, xiyobonlar hamda kinoteatrlar barpo etiladi.
Qurilish rejasini amalga oshirish jarayonida ilg‘or usullar, jumladan, loyihalarni ishlab chiqish, ularni rejalashtirish hamda ma’lumotlarni qayta ishlab chiqish bo‘yicha raqamli yechimlarni joriy etishga e’tibor qaratish rejalashtirilgan.
Xavfsizlik tizimining so‘nggi va zamonaviy innovatsion ishlanmalari, kommunal xizmatlar narxlarini optimallashtirish asosida yuqori darajadagi “aqlli” uy texnologiyalarini joriy etish rejalashtirilgan. Bularning barchasi masofadan turib, mobil ilovalar orqali kirish imkoniyatidan foydalangan holda aholi va bino egalari tomonidan nazorat qilinadi.
Ma’lum qilinishicha, 2021-yilning 1-dekabridan texnik shartlarini ta’minlash maqsadida magistral kanalizatsiya tarmoqlarini qurish ishlari boshlanadi. Qurilish jarayonida, avvalo, magistral aloqa tarmoqlari tizimi – suv ta’minoti, kanalizatsiya, elektr energiyasi, gaz va internet tarmoqlarini yo‘lga qo‘yish ishlari ham amalga oshiriladi.
Hozirda “Guliston Business City” rahbariyati tomonidan xorijiy investorlarni jalb etish maqsadida sharoitlar yaratilmoqda.
“Guliston Business City” qurilishi rejalashtirilgan hududda Murad Building firmasi rahbari Murod Nazarov, Dantes Construction yetakchisi Dantes Ustajalilov, BI Group boshlig‘i Oydin Raximboyev kabi yirik mahalliy va xorijiy investitsiya kompaniyalari rahbarlari bilan uchrashuv o‘tkazildi.
Ayni paytda biznes markazining rahbariyati qurilish jarayonlarini yanada jonlantirish maqsadida mahalliy va xorijiy investorlarni kengroq jalb etish ishlari amalga oshirmoqda.
Avvalroq Namanganda milliarder Alisher Usmonov homiyligida Xalqaro biznes markazi qurilishi 2021-yil bahorida boshlanishi hamda Toshkentdagi G‘afur G‘ulom nomidagi istirohat bog‘i buzilib, o‘rniga turar joy majmuasi qurilishi haqidagi xabarga munosabat bildirilgani haqida xabar berilgandi.
Izoh (0)