Amerika prezidenti Donald Tramp ma’muriyati 2020-yil yozida Pfizer kompaniyasining koronavirus infeksiyasiga qarshi vaksinaning qo‘shimcha partiyasini sotib olish imkoniyatini muhokama qilish taklifini rad etgan. Bu haqda The New York Times (NYT) hukumat va ishlab chiqaruvchi o‘rtasidagi muzokaralardan xabardor bo‘lgan manbalariga tayanib xabar berdi, deb yozadi “RBK”.
Iyul oyida Pfizer hukumat bilan 50 million amerikalikni emlashga yetadigan 100 million doza (bir kishiga ikkitadan inyeksiya) vaksina yetkazib berish uchun 1,95 milliard dollarlik shartnoma imzolagan. Shartnoma dorining klinik sinovlari tugashidan oldinroq tuzilgan, farmokologik gigant vaksina samaradorligi isbotlangan taqdirdagina partiyani yetkazib berishi kerak edi.
Noyabr oyida Pfizer va uning germaniyalik sherigi BioNTech tomonidan ishlab chiqilgan vaksina 95 foiz samaradorlik ko‘rsatdi va avvalroq tuzilgan shartnoma ishga solindi. Ammo, NYT manbalarining ma’lum qilishicha, ishlab chiqaruvchilar shartnomani imzolash bosqichidayoq Oq uyga yana 100 millionta dozadan iborat qo‘shimcha partiyani sotib olish imkoniyatini ko‘rib chiqishni taklif qilgan. Prezident ma’muriyati esa bundan voz kechgan.
Endi esa gazetaning yozishicha, Pfizer vaksinasiga talab oshib ketgan va uni boshqa ko‘plab mamlakatlar ham buyurtma qilgan. Xususan, Buyuk Britaniya 40 million doza sotib olmoqchi. Yevroittifoq esa kuz boshida farmkompaniya taklifini qabul qilib, 200 millionta dozani yana 100 million doza sotib olish imkoniyati bilan birga xarid qilishga rozi bo‘ldi.
Pfizer prezidenti Albert Burla vaksinadan yil oxirigacha 50 million, 2021-yilda esa 1,3 milliard dozagacha ishlab chiqarish rejalarini e’lon qilgan edi.
AQSh Sog‘liqni saqlash va ijtimoiy xizmatlar vazirligi federal hukumat Pfizer’dan tashqari, yana beshta ishlab chiqaruvchidan vaksinalar sotib olinishini ma’lum qildi. Xususan, 90 foizdan ziyod samaradorlik ko‘rsatgan Moderna kompaniyasi vaksinasini 100 million dozada sotib oladi. Bundan tashqari, AQSh avvalroq tuzilgan shartnomalar doirasida AstraZeneca, Johnson & Johnson, Sanofi va boshqa kompaniyalardan ham dorilar olishga umid qilmoqda.
Avvalroq AQSh aholisi COVID-19’ga qarshi hammadan birinchi bo‘lib emlanishi xabar berilgan edi. AQSh prezidenti Donald Tramp imzolaydigan farmonga muvofiq, amerikaliklar emlanganidan keyingina koronavirusga qarshi vaksinalar boshqa mamlakatlarga ham yetkazilishni boshlaydi.
Trampning ehtimoliy farmoni haqidagi xabarlar AQSh sanitar nazorat boshqarmasi (FDA)ning majlisidan bir necha kun avval paydo bo‘ldi, unda regulyator Amerikaning Pfizer va Germaniyaning BioNTech kompaniyalari vaksinasidan foydalanishni ma’qullash-ma’qullamaslik masalasini hal qiladi. Mamlakatda Amerikaning Moderna kompaniyasi ishlab chiqqan yana bir vaksinani ro‘yxatdan o‘tkazish masalasi esa kelasi hafta, 17-dekabr kuni ko‘rib chiqiladi.
Ikkala vaksina ham sinovlar chog‘ida yuqori samaradorlik ko‘rsatdi. Pfizer dorisining samaradorligi 95 foiz, Moderna vaksinasiniki — 94,1 foiz (og‘ir holatlarda 100 foiz)ni tashkil etdi.
Bloomberg xabariga ko‘ra, AQSh Pfizer vaksinasidan 600 millionta dozani oldindan buyurtma qilib qo‘ygan. Yil oxirigacha kompaniya 100 millionta doza ishlab chiqarishi kerak edi, ammo unda ilk bosqichlarda xomashyo yetkazib berish bilan bog‘liq muammolar yuzaga keldi, shu sababli ikki marta kamroq doza ishlab chiqaradi.
Izoh (0)