Odatda kam ta’minlangan oilalarda voyaga yetgan futbolchilarning yaxshiroq o‘ynashi va sportda katta yutuqlarga erishish imkoniyati yuqori baholanadi. Biroq har sohada bo‘lgani kabi futbolda ham istisno holatlar kuzatilib turadi. Bugun aynan mana shunday, badavlat oiladan yetishib chiqqan taniqli futbolchilar (ularning ayrimlari faoliyatini yakunlagan) haqida fikr yuritamiz.
Xerard Pike
Ishonish qiyin ammo “Barselona” tarixidagi eng yaxshi himoyachilaridan biri Pike umuman futbol o‘ynamasligi ham mumkin edi. Xerard juda boy oilada dunyoga keladi. Otasi Barselonaning taniqli advokati, onasi esa xususiy klinika xo‘jayini edi. Ammo Pikening bobosi bolakayning taqdirida hal qiluvchi rolni o‘ynaydi. O‘sha davrlarda yosh Xerardning bobosi Amador Bernabeu “Barselona” klubining vitse-prezidenti edi va aynan u Pikening futbol bilan shug‘ullanishini xohlagan. Yakunda bu qaror o‘zini to‘laligicha oqladi, deyish mumkin.
Andrea Pirlo
Italiyalik futbolchining otasi po‘lat ishlab chiqaradigan kompaniyaga egalik qiladi. Tabiiyki, bundan Andreaga ham tegishli ulush ajratilgan. Intervyularidan birida Andrea dividendlari keksalikka qadar farovon yashash uchun yetarli bo‘lishini aytgandi.
Ammo futbolga bo‘lgan muhabbat ustunlik qiladi va zavod egasining boyvachcha o‘g‘li 2006-yilgi Jahon Kubogini qo‘lga kiritadi.
Kaka
Braziliyalik o‘yinchilar uchun odatda futbol yagona najot vazifasini bajarib beradi. Biroq bu gaplarning Kakaga umuman aloqasi yo‘q. Futbolchining otasi taniqli va obro‘li muhandis bo‘lib, unda moddiyat taraflama hech qanday muammolar ko‘zga tashlanmagan. Onasi o‘qituvchi bo‘lishiga qaramay, ko‘p vaqtini o‘g‘lining tarbiyasiga ajratgan.
Yoshligidan “tilla bola” nomini olgan Kaka 2007-yilda sayyoraning eng yaxshi futbolchisi nomiga loyiq ko‘riladi.
Robin van Persi
Niderlandiyalik sobiq futbolchining tomirida ijodkorlar qoni oqadi. Uning otasi mashhur haykaltarosh, onasi esa dizayner. Ko‘pchilik Robinning ham ota-onasining izidan borib, san’at yo‘lini tanlashini taxmin qilgandi. Ammo bolakay futbolga muhabbat qo‘ydi va u bilan jiddiy shug‘ullana boshladi.
Yakunda Robin van Persi o‘z avlodi va Niderlandiya terma jamoasining eng yaxshi hujumchilaridan biriga aylandi. U erishgan natijalarga esa faqat havas qilish mumkin.
Mario Balotelli
Italiya futbolining eng mojaroli vakillaridan biri Marioning taqdiri ushbu ro‘yxatdagi boshqa futbolchilarning hikoyalaridan biroz farq qiladi.
Balotelli ganalik muhojirlar oilasida dunyoga keladi. Tug‘ilganida, bolakay qimmatli terapiyaga muhtoj edi, shuning uchun uning ota-onasi farzandini vasiylik organlariga berishga majbur bo‘ladi. U yerdan esa uni Breshiyaning nufuzli oilalardan biri asrab oladi.
Yangi oila Marioni yaxshi hayot kechirishi uchun zarur bo‘lgan barcha narsalar bilan ta’minlaydi. Bundan tashqari, ularning Marioni ortiqcha erkalatib yuborgani aytiladi, bu esa uning xarakterida yaqqol namoyon bo‘ladi. U nafaqat maydonda, balki uning tashqarisida ham qator ishkallarga o‘ralashib yuradi.
Ugo Lyoris
Bugungi kunning eng yaxshi darvozabonlaridan biri Ugo Lyoris Nitssa shahrining obro‘li tumanlarida bankir va advokatlar oilasida dunyoga keladi.
Lyorisning futbolga bo‘lgan muhabbatiga qaramay, ota-onasi uni boylar o‘yini bo‘lgan — tennisga beradi. E’tiborga molik jihati, Lyoris ushbu sport turida ham qator muvaffaqiyatlarga erishadi. Biroq so‘nggi tanlovni amalga oshirish vaqti kelganida, Ugo ikkilanishlarsiz raketkasini chetga surib, darvozabonlik qo‘lqoplarini kiyadi. Keyin nima bo‘lgani esa hammaga ma’lum. U uzoq yillardan beri “Tottenhem” va Fransiya terma jamoasining almashtirib bo‘lmas posboni sanaladi.
Izoh (0)