Одатда кам таъминланган оилаларда вояга етган футболчиларнинг яхшироқ ўйнаши ва спортда катта ютуқларга эришиш имконияти юқори баҳоланади. Бироқ ҳар соҳада бўлгани каби футболда ҳам истисно ҳолатлар кузатилиб туради. Бугун айнан мана шундай, бадавлат оиладан етишиб чиққан таниқли футболчилар (уларнинг айримлари фаолиятини якунлаган) ҳақида фикр юритамиз.
Херард Пике
Ишониш қийин аммо «Барселона» тарихидаги энг яхши ҳимоячиларидан бири Пике умуман футбол ўйнамаслиги ҳам мумкин эди. Херард жуда бой оилада дунёга келади. Отаси Барселонанинг таниқли адвокати, онаси эса хусусий клиника хўжайини эди. Аммо Пикенинг бобоси болакайнинг тақдирида ҳал қилувчи ролни ўйнайди. Ўша даврларда ёш Херарднинг бобоси Амадор Бернабеу «Барселона» клубининг вице-президенти эди ва айнан у Пикенинг футбол билан шуғулланишини хоҳлаган. Якунда бу қарор ўзини тўлалигича оқлади, дейиш мумкин.
Андреа Пирло
Италиялик футболчининг отаси пўлат ишлаб чиқарадиган компанияга эгалик қилади. Табиийки, бундан Андреага ҳам тегишли улуш ажратилган. Интервьюларидан бирида Андреа дивидендлари кексаликка қадар фаровон яшаш учун етарли бўлишини айтганди.
Аммо футболга бўлган муҳаббат устунлик қилади ва завод эгасининг бойвачча ўғли 2006 йилги Жаҳон Кубогини қўлга киритади.
Кака
Бразилиялик ўйинчилар учун одатда футбол ягона нажот вазифасини бажариб беради. Бироқ бу гапларнинг Какага умуман алоқаси йўқ. Футболчининг отаси таниқли ва обрўли муҳандис бўлиб, унда моддият тарафлама ҳеч қандай муаммолар кўзга ташланмаган. Онаси ўқитувчи бўлишига қарамай, кўп вақтини ўғлининг тарбиясига ажратган.
Ёшлигидан «тилла бола» номини олган Кака 2007 йилда сайёранинг энг яхши футболчиси номига лойиқ кўрилади.
Робин ван Перси
Нидерландиялик собиқ футболчининг томирида ижодкорлар қони оқади. Унинг отаси машҳур ҳайкалтарош, онаси эса дизайнер. Кўпчилик Робиннинг ҳам ота-онасининг изидан бориб, санъат йўлини танлашини тахмин қилганди. Аммо болакай футболга муҳаббат қўйди ва у билан жиддий шуғуллана бошлади.
Якунда Робин ван Перси ўз авлоди ва Нидерландия терма жамоасининг энг яхши ҳужумчиларидан бирига айланди. У эришган натижаларга эса фақат ҳавас қилиш мумкин.
Марио Балотелли
Италия футболининг энг можароли вакилларидан бири Марионинг тақдири ушбу рўйхатдаги бошқа футболчиларнинг ҳикояларидан бироз фарқ қилади.
Балотелли ганалик муҳожирлар оиласида дунёга келади. Туғилганида, болакай қимматли терапияга муҳтож эди, шунинг учун унинг ота-онаси фарзандини васийлик органларига беришга мажбур бўлади. У ердан эса уни Брешиянинг нуфузли оилалардан бири асраб олади.
Янги оила Мариони яхши ҳаёт кечириши учун зарур бўлган барча нарсалар билан таъминлайди. Бундан ташқари, уларнинг Мариони ортиқча эркалатиб юборгани айтилади, бу эса унинг характерида яққол намоён бўлади. У нафақат майдонда, балки унинг ташқарисида ҳам қатор ишкалларга ўралашиб юради.
Уго Льорис
Бугунги куннинг энг яхши дарвозабонларидан бири Уго Льорис Ницца шаҳрининг обрўли туманларида банкир ва адвокатлар оиласида дунёга келади.
Льориснинг футболга бўлган муҳаббатига қарамай, ота-онаси уни бойлар ўйини бўлган — теннисга беради. Эътиборга молик жиҳати, Льорис ушбу спорт турида ҳам қатор муваффақиятларга эришади. Бироқ сўнгги танловни амалга ошириш вақти келганида, Уго иккиланишларсиз ракеткасини четга суриб, дарвозабонлик қўлқопларини кияди. Кейин нима бўлгани эса ҳаммага маълум. У узоқ йиллардан бери «Тоттенҳэм» ва Франция терма жамоасининг алмаштириб бўлмас посбони саналади.
Изоҳ (0)