Nyu-Jersi shtatining Manchester shahri yaqinidagi o‘rmonda yo‘qolib qolgan erkakning iti ovga chiqqan politsiyachini o‘z xo‘jayinining yoniga yordamga olib keldi, deb xabar beradi ABC 7 nashri.
Yo‘qolgan erkakning qizi 27-noyabr kuni soat 20:00 larda politsiyaga qo‘ng‘iroq qilib, otasi soat 16:30 dan buyon aloqaga chiqmayotganini ma’lum qilgan. Politsiyachilar erkak va uning avtomobilini topa olmagan, shuningdek, uning mobil telefoniga bir necha bor qo‘ng‘iroq qilib ham bog‘lanishning iloji bo‘lmagan.
Ertasi kuni soat 05:45 larda erkak qo‘ng‘iroqqa javob berib, huquq-tartibot organi xodimlariga mashinani o‘rmonda urib olgani va aynan qayerda ekanligini bilmasligini aytgan. Shundan so‘ng erkak yonida o‘sha kuni dam olish uchun o‘rmonga chiqqan politsiyachi ham borligini bildirgan.
Politsiya serjanti Charlz Bruks ov qilib yurgan vaqtida yo‘lakdagi itni ko‘rib qolgan. U hayvon egasidan qochib ketganini tushunib, uning izidan borgan. Bir necha yuz metr yurgan Bruks yo‘qolgan erkakka duch kelgan. U o‘z hamkasblariga o‘rmondan topilgan erkak haqida ma’lumot yuborgan.
“Ushbu vaziyat politsiyachilar kun davomida ham politsiya xodimiligicha qolishini yana bir bor isbotlaydi. Bruks kerakli vaqtda va kerakli joyda bo‘lgani sabab omadimiz keldi, agar u bo‘lmaganida buning nima bilan yakun topishi noma’lum edi”, — deydi Manchester politsiyasi shefi Liza Parker.
Avvalroq Avstraliyada it o‘z xo‘jayinini himoya qilish maqsadida uning oldiga suzib kelayotgan akulaga tashlangani to‘g‘risida xabar berilgandi.
Izoh (0)