Нью-Жерси штатининг Манчестер шаҳри яқинидаги ўрмонда йўқолиб қолган эркакнинг ити овга чиққан полициячини ўз хўжайинининг ёнига ёрдамга олиб келди, деб хабар беради АBC 7 нашри.
Йўқолган эркакнинг қизи 27 ноябрь куни соат 20:00 ларда полицияга қўнғироқ қилиб, отаси соат 16:30 дан буён алоқага чиқмаётганини маълум қилган. Полициячилар эркак ва унинг автомобилини топа олмаган, шунингдек, унинг мобил телефонига бир неча бор қўнғироқ қилиб ҳам боғланишнинг иложи бўлмаган.
Эртаси куни соат 05:45 ларда эркак қўнғироққа жавоб бериб, ҳуқуқ-тартибот органи ходимларига машинани ўрмонда уриб олгани ва айнан қаерда эканлигини билмаслигини айтган. Шундан сўнг эркак ёнида ўша куни дам олиш учун ўрмонга чиққан полициячи ҳам борлигини билдирган.
Полиция сержанти Чарльз Брукс ов қилиб юрган вақтида йўлакдаги итни кўриб қолган. У ҳайвон эгасидан қочиб кетганини тушуниб, унинг изидан борган. Бир неча юз метр юрган Брукс йўқолган эркакка дуч келган. У ўз ҳамкасбларига ўрмондан топилган эркак ҳақида маълумот юборган.
«Ушбу вазият полициячилар кун давомида ҳам полиция ходимилигича қолишини яна бир бор исботлайди. Брукс керакли вақтда ва керакли жойда бўлгани сабаб омадимиз келди, агар у бўлмаганида бунинг нима билан якун топиши номаълум эди», — дейди Манчестер полицияси шефи Лиза Паркер.
Аввалроқ Австралияда ит ўз хўжайинини ҳимоя қилиш мақсадида унинг олдига сузиб келаётган акулага ташлангани тўғрисида хабар берилганди.
Изоҳ (0)