JARda 1-dekabr kuni jekpot miqdori 7,4 million AQSh dollaridan ko‘proq bo‘lgan PowerBall milliy lotereyasi o‘ynaldi. Oltita sondan iborat sovrinli kombinatsiyani bir vaqtning o‘zida 20 kishi topishga muvaffaq bo‘lgan, deb xabar beradi BBC.
Lotereya qoidalarida ko‘ra, ishtirokchilar 1 dan 50 gacha bo‘lgan sonlar orasida beshta asosiy sonni, shuningdek, qo‘shimcha yana bir sonni — PowerBall — 1 dan 20 gacha bo‘lganlar orasidan tanlashi kerak. Jekpotni yutish ehtimolligi 42 375 200/1 ga teng.
Lotereyaning translyatsiya videosidan ko‘rish mumkinki, avvaliga lotereyada 8, 5, 9, 7, 6 sonlari tushgan, shundan so‘ng esa PowerBall — 10.
Shu kunning o‘zida JARdagi eng yirik lotereya operatori — Ithuba xoldingi sovrinni qo‘lga kiritgan “20 nafar multimillioner”ni tabriklagan. Shuningdek, kompaniya sovrinli ketma-ketlikka izoh ham bergan: “Tushgan sonlar kutilmagan kombinatsiyadek ko‘rinishi mumkin, biroq lotereyaning ko‘plab ishtirokchilari aynan unga tikkanini ko‘rib turibmiz”.
Har bir g‘olib 5,7 million JAR rendi (370 ming dollar) miqdorida mukofotni qo‘lga kiritgan. Lotereya tashkilotchisining Twitter’dagi sahifasiga joylashtirilgan videoda g‘oliblar JARning yettita viloyatida istiqomat qilishi aytilgan (mamlakatda 9 ta viloyat bor). Xususan, sakkiz nafari Gautenge — eng yirik Yoxannesburg shahri joylashgan viloyatda istiqomat qiladi. Lotereyaning yana 79 nafar ishtirokchisi 5 dan 9 gacha bo‘lgan ketma-ketlikni aniqlab, 6283 rendni (409 dollar) qo‘lga kiritgan.
Congratulations to 20 new multimillionaires who each won over R5 million on the PowerBall jackpot! 5, 6, 7, 8, 9, 10 🙌 🤑 What will your winning numbers be? Check your tickets now to see if you’re a winner #FestiveYamaMillions pic.twitter.com/7DYpDjTL4R
— #PhandaPushaPlay (@sa_lottery) December 2, 2020
Natijalar e’lon qilingach, ijtimoiy tarmoq foydalanuvchilari tashkilotchilarni firibgarlikda ayblay boshlagan. Twitter’dagi foydalanuvchilardan biri “jin ursin, bu tasodif emas” deb yozib, yutuqli raqamlar oldinroq e’lon qilinganini bildirgan. Ko‘pchilik sodir bo‘lgan voqea tekshirilishini talab qilgan.
Lotereya bo‘yicha JAR Milliy komissiyasi yutuqlar chiqqan raqamlar ketma-ketligi “noodatiy, biroq imkonsiz emas”ligini ma’lum qilgan. Komissiyaning ta’kidlashicha, mamlakatdagi barcha lotereyalar qattiq nazorat ostida bo‘lib, ularning haqqoniy o‘tkazilishi ta’minlangan. 1-dekabr kungi lotereyada tasodifiy sonlar generatoridan foydalanilgan va u idora mutaxassislari kuzatuvi ostida bo‘lgan.
Lotereyada 20 kishining g‘olib chiqishi — JAR uchun kamdan kam uchraydigan holat. So‘nggi marta mamlakatda jekpot eng ko‘p ishtirokchilar o‘rtasida 2003-yilning martida taqsimlangan — o‘shanda 33 kishi sovringa ega chiqqandi.
Izoh (0)